नवी दिल्ली – 2024च्या लोकसभा निवडणुकीसाठी काँग्रेसने जाहीरनामा समिती स्थापन केली आहे. माजी केंद्रीय मंत्री आणि पक्षाचे ज्येष्ठ नेते पी. चिदंबरम यांना अध्यक्ष करण्यात आले आहे. छत्तीसगडचे माजी उपमुख्यमंत्री टीएस सिंगदेव हे समितीचे निमंत्रक असतील.
या 16 सदस्यीय समितीमध्ये प्रियंका गांधी-वढेरा, कर्नाटकचे मुख्यमंत्री सिद्धरामय्या, जयराम रमेश आणि शशी थरूर यांचाही समावेश असेल. त्याचवेळी काँग्रेसने ठराव मंजूर केला आहे. यानुसार मोदी सरकारच्या कथनी आणि करणीतील फरक निदर्शनास आणून दिला जाईल.
या जाहीरनामा समितीमध्ये माजी केंद्रीय मंत्री आनंद शर्मा, मणिपूरचे माजी उपमुख्यमंत्री गायखंगम, पक्षाचे लोकसभेतील उपनेते गौरव गोगोई, ऑल इंडिया प्रोफेशनल्स काँग्रेसचे प्रमुख प्रवीण चक्रवर्ती, इम्रान प्रतापगढ़ी, के. राजू, ओंकार सिंग मरकम, रंजीत रंजन, जिग्नेश मेवाणी आणि गुरदीप सप्पल यांचा समावेश आहे.
मध्य प्रदेश, छत्तीसगड आणि राजस्थानातील पराभवानंतर काँग्रेस 2024च्या लोकसभा निवडणुकीकडे लक्ष देत आहे. पक्षाने काँग्रेस कार्यकारिणीची बैठक बोलावली होती, ज्यामध्ये लोकसभा निवडणुकीच्या रणनीतीवर चर्चा करण्यात आली होती. यानंतर काँग्रेसने जाहीरनामा समिती स्थापन करण्याची घोषणा केली.
सीडब्ल्यूसीच्या बैठकीत ठराव मंजूर करण्यात आला. त्यात म्हटले आहे की, पक्ष मोदी सरकारच्या कमकुवतपणाचा पर्दाफाश करेल. पंतप्रधान नरेंद्र मोदी यांचे दावे आणि जमिनीवरील वास्तव यात खूप फरक आहे. सामाजिक ध्रुवीकरण खूप वाढले आहे आणि त्याचा वापर निवडणुका जिंकण्यासाठी केला जात आहे. लोकशाही कोलमडली आहे, असेही ठरावात म्हटले होते. लोकशाहीवरच हल्ला होत असून, संविधानाने नागरिकांना दिलेले स्वातंत्र्य हिरावून घेतले आहे, आदी मुद्द्यांवर भद दिला जाणार आहे.