नवी दिल्ली : राजस्थानच्या धौलपूरमधून एक फिल्मी स्टाईल ड्रामा घडला आहे. एका तरूणाने परिसरात मंगळवारी’शोले स्टाईल ड्रामा’ केला. त्यासाठी तो तरुण चक्क ५० फूट उंच असणाऱ्या पिंपळाच्या झाडावर चढला. त्यामुळे परिसरात एकच गोंधळ उडाला. इतकेच नाही तर या तरूणाने झाडावर चढल्यावर स्वत:चे पाय दोरीने बांधून घेतले होते.
स्थानिक लोकांनी प्रशासनाला याबाबत माहिती दिली तेव्हा मोठ्या प्रयत्नांनंतर त्याला खाली उतरवण्यात आल्याचे सांगण्यात येत आहे. या घटनेची माहिती प्रशासनाला देताच त्यांनी तरूणाला खाली उतरवण्यासाठी क्रेन आणली. त्यानंतर खाली गाद्या टाकण्यात आल्या. तरूणाला खूप समजावून सांगितल्यावर त्याला खाली सुरक्षित उतरवण्यात आले. त्याला खाली उतरवताच प्रशासनाने सुटकेचा नि:श्वास घेतला.
पोलीस या तरूणाला सोबत घेऊन गेले आणि त्याची चौकशी केली गेली. मिळालेल्या माहितीनुसार, या तरूणाने हा सर्व ड्रामा केला कारण त्याची पत्नी माहेरी गेली आहे आणि परत सासरी येत नाहीये. यात तरूणाची कुणी मदतही करत नाहीये. मीडिया रिपोर्टनुसार, तरूणाने हा हाय व्होल्टेज ड्रामा आपल्या माहेरी गेलेल्या पत्नीवर नाराज होऊन केला. कारण त्याची पत्नी परतच येत नाहीये आणि यात कुणी त्याची मदतही करत नाहीये. या तरूणाचे नाव लहोरेराम भदौरिया आहे. त्याची पत्नी गेल्या दोन वर्षापासून आपल्या माहेरी गेली आहे.
या तरूणाने सांगितले की, माहेरचे लोक त्याच्या पत्नीला खोटं काही सांगून घेऊन गेले आणि आता ते तिला परत येऊ देत नाहीयेत. त्याने अनेकदा पोलिसातही याबाबत सांगितले. पण त्याची मदत कुणी केली नाही. त्यामुळे हैराण होऊन अखेर तो पिंपळाच्या झाडावर चढला. जेणेकरून त्याची पत्नी परत येईल. पोलिसांनी सांगितले की, या प्रकरणाची चौकशी केली जात आहे. त्याची पत्नी सासरी परत का येत नाहीये याचाही तपास घेतला जात आहे. सध्या तरूणाला पोलिसांनी ताब्यात घेतलं आहे.