मुंबई – छोट्या पडद्यावरील लोकप्रिय रियालिटी शो “इंडियन आयडॉल-12’च्या सीजनमधील विजेता काल निश्‍चित करण्यात आला. ‘इंडियन आयडॉल-12’ च्या सिझनच्या ट्रॉफीवर पवनदीप राजनने आपलं नाव कोरलं. या यशामुळे पवनदीपचे संपूर्ण भारतभरातून स्वागत केले जात आहे. यावेळी पवनदीपचा 25 लाख रुपये तसेच ट्रॉफीच्या स्वरुपात सन्मान करण्यात आला.
मागील वर्षभरापासून इंडियन आयडॉल हा गायनाचा शो सुरु होता. इंडियन आयडॉल या कार्यक्रमाला संपूर्ण भारतभरातून पसंदी मिळाली. सोशल मीडिया, तसेच यूट्यूबच्या माध्यमातून या कार्यक्रमाची नेहमीच चर्चा होत आली आहे.
यंदा दोन दिवस इंडियन आयडॉल-12 चा सीजन तब्बल 12 तास रंगला होता. या भव्य एपिसोडमध्ये ग्लॅमरसह बॉलीवूडचाही तडका लावण्यात आला. आणि भारतातील अनेक मोठ्या आणि प्रसिद्ध गायकांनी त्यांच्या चमकदार कामगिरीने गाठ बांधली.
इंडियन आयडॉलच्या सुरुवातीपासूनच पवनदीप राजन हा परीक्षक आणि चाहत्यांचा आवडता स्पर्धक होता. पवनदीपने शोमध्ये एकापेक्षा जास्त सुपरहिट परफॉर्मन्स देऊन संपूर्ण देशाची मने जिंकली आहेत. तो केवळ गायनच करत नाही तर अनेक वाद्ये देखील वाजवतो. त्याच्या याच कलागुणांना खूश होऊन ज्येष्ठ गायक बप्पी लहिरी यांनी पवनदीपला त्यांचा तबला भेट दिला होता.
27 जुलै 1996 रोजी चंपावत, उत्तराखंड येथे पवनदीपचा जन्म झाला. त्याचे वडील सुरेश राजन हे देखील गायक आहेत, जे उत्तराखंडच्या स्थानिक कार्यक्रमांमध्ये आणि सार्वजनिक कार्यक्रमांमध्ये गात असतात. त्याला दोन बहिणी देखील आहेत, जे त्याच्यासोबत इंडियन आयडॉल 12 मध्ये दिसले होते.
कॉलेजच्या दिवसांत पवनदीप युवा महोत्सवात सहभागी व्हायचा. एक दिवस पवनदीपला “द व्हॉईस इंडिया” या शोबद्दल माहिती मिळाली. त्याने शोचे ऑडिशन सुद्धा दिले आणि तो या कार्यक्रमात सहभागी देखील झाला होता. त्यावेळी त्याची केशरचना देखील पाहण्यासारखी होती.
2015 मध्ये, पवनदीप “द व्हॉइस इंडिया’ शोचा विजेता बनला आणि ट्रॉफीसह 50 लाख रुपये देऊन त्याचा सन्मान करण्यात आला होता. यासोबत त्याला अल्टो के 10 कारही मिळाली. याशिवाय, त्याने आपले पहिले गाणे रिलीज करण्यासाठी युनिव्हर्सल म्युझिक ग्रुपसोबत करार केला.
पवनदीपने 2015 मध्ये त्याचे पहिले गाणे ‘याकिएन’ रिलीज केले. यासोबतच त्यांची उत्तराखंडचे युवा ब्रँड अॅम्बेसेडर म्हणून निवड झाली. 2016 मध्ये, पवनदीप ने आरोन हारुन रशीद सोबत काम केले आणि त्याच्या Chholiyar या अल्बम मध्ये दोन गाणी रिलीज केली.
