वाई -धोम खून खटल्यातील माफीची साक्षीदार ज्योती मांढरे हिचा संतोष पोळ याने तब्बल साडेचार तास उलट तपास घेतला. त्यात भुलीची इंजेक्शन, त्यासाठीच्या सुया, प्रमाण याबाबत तिला बरेच उलट सुलट प्रश्न विचारले. तिने आजपर्यंत चुकीची माहिती पोलिसांना दिल्याचे उलट तपासणीत सिद्ध करण्याचा प्रयत्न संतोष पोळ याने केला. उलट तपास बाकी असल्याचे सांगत पुढील तारीख घेण्यात आली.
धोम (ता. वाई) खून खटल्याची सुनावणी वाई येथील अतिरिक्त जिल्हा न्यायाधीश एस. जी. नंदीमठ यांच्या न्यायालयात सुरु आहे. ज्योती मांढरेचा उलट तपास आज पुन्हा पुढे सुरु झाला. सुनावणीसाठी सरकारी वकील ऍड. उज्वल निकम वाई न्यायालयात आले होते. संतोष पोळ याला बंदोबस्तात न्यायालयात आणण्यात आले. यावेळी जिल्हा सरकारी वकील मिलिंद ओक उपस्थित होते. ज्योती मांढरे हिचा उलट तपास प्रमुख आरोपी असेलेल्या संतोष पोळ घेत आहे.
आज त्याने भुलीची कोणत्या कंपनीची इंजेक्शन या खून प्रकरणात वापरली होती, यासाठीच्या कोणत्या कंपनीच्या सुयांचा वापर करण्यात आला आदी अनेक उलटसुलट प्रश्न विचारले. काही प्रश्नांना माहित असल्याचे व माहिती नसल्याचे उत्तरे दिली. दिलेली भुलीची इंजेक्शन कितीतरी वर्षांपूर्वी बंद झाली असल्याचे तुला माहिती आहे का, असा प्रश्नही त्याने ज्योती मांढरेला विचारला. याबाबत जास्त माहिती नसल्याचे तिने यावेळी सांगितले. भुलीच्या इंजेक्शनमध्ये किती मिलीग्रॅम औषध घेतले होते, भुलीचे इंजेक्शन वापरण्याचे प्रमाण किती असते, अशा आशयाचे प्रश्न यावेळी ज्योतीला विचारण्यात आले. आज सकाळच्या सत्रात न्यायालयात सुनावणी झाली.
ज्योती मांढरेची प्रकृती ठीक नसल्यामुळे व तिला मधुमेह असल्याने चक्कर येत असल्याचे तिने न्यायालयाला सांगितले. त्यामुळे न्यायालयाने दि. 1 जुलै रोजी पुढील सुनावणी नेमली आहे. त्यादिवशी पुन्हा ज्योती मांढरेचा उलट तपास सुरू राहणार आहे. न्यायालयात सुनावणी ऐकण्यासाठी वकिलांनी गर्दी केली होती. न्यायालय परिसरात संतोष पोळला आणले असल्याने मोठा बंदोबस्त ठेवण्यात आला होता.