न्यूयॉर्क : टायटॅनिक पाहण्यासाठी गेलेल्या टायटन पाणबुडीचा स्फोट होऊन त्यातील पाच प्रवाशांचा दुर्दैवी मृत्यू झाला. या अपघातात जगातील पाच अब्जाधीशांचा मृत्यू झाला आहे. दरम्यान, अटलांटिक महासागरात अपघातग्रस्त टायटॅनिक जहाजाचे अवशेष पाहण्यासाठी गेलेली टायटन ओशनगेट एक्स्पिडिशन्स सबमर्सिबल ही पाणबुडी रविवारी बेपत्ता झाली होती. त्यानंतर गुरुवारी सकाळी अटलांटिक समुद्रात पाणबुडीचे अवशेष आढळून आले. टायटन पाणबुडीचा स्फोट झाले असून टायटॅनिक जहाजाच्या अवशेषांजवळच या पाणबुडी अवशेष आढळून आले असल्याची माहिती अमेरिकन नौदल अधिकाऱ्यांनी दिली. मात्र पाणबुडीच्या स्फोटामागचे नेमके कारण आता समोर आले आहे.
समुद्रात टायटॅनिक जहाजाच्या ढिगाऱ्याच्या जवळ टायटन पाणबुडीचे अवशेष सापडले आहेत. कॅनडाने रिमोट ऑपरेटेड यूएव्ही म्हणजे ड्रोनप्रमाणे दिसणाऱ्या एका यंत्राच्या साहाय्याने अवशेष जप्त केले आहेत. टायटन पाणबुडीच्या मोहिमेचे नेतृत्व करणाऱ्या ओशनगेट या कंपनीनेसुद्धा ही बाब स्पष्ट केली आहे. तज्ज्ञांच्या मते, टायटन पाणबुडीचा स्फोट कॅटास्ट्रॉफिक इम्प्लोजन होऊन असल्याचे सांगितले जात आहे. यानुसार, पाणबुडीच्या आतमध्ये काही घटना घडली ज्यामुळे पाणबुडीने सुरळीत काम करणे बंद पडले. यामुळे पाणबुडीचे नुकसान झाले आणि ती टायटॅनिक जहाजाजवळच बुडाली, असे म्हटले जात आहे.
कॅटास्ट्रॉफिक इम्प्लोजन म्हणजे काय ?
कॅटास्ट्रॉफिक इम्प्लोजन ही एक प्रक्रिया आहे. यामध्ये पाणबुडीच्या आतील भागात इतका दबाव वाढतो आणि ती खराब होते आणि नंतर काम करणं थांबवतं. एका वर्तमानपत्रानुसार, बंदिस्त जागेवर जास्त दाब आल्यावर अशी परिस्थिती उद्भवते आणि पाणबुडीमध्ये तो दबाव हाताळण्याची क्षमता नसेल तर त्याचा अंतर्गत स्फोट होतो.
सोप्या भाषेत सांगायचं झालं तर, समुद्रामध्ये पाण्याचा दबाव असतो. पाण्याच्या खोलीनुसार, हा दबाव वाढत जातो. टायटन पाणबुडी पाण्याच्या आत गेली तेव्हा ती बंदीस्त असल्यामुळे त्यावर बाहेरच्या पाण्याचा दबाव वाढला. हा दबाव पाणबुडीच्या आतील दबावापेक्षा जास्त होता. परिणामी हा दाब पाणबुडी सहन करु शकली नाही आणि त्यामध्ये अंतर्गत स्फोट झाला आणि पाचही प्रवाशांचा मृत्यू झाला असल्याचे सांगण्यात येत आहे.