पुणे – पंतप्रधान नरेंद्र मोदी यांना काळे झेंडे दाखवणे, त्यांचा निषेध व्यक्त करण्यासाठी शहरात वेगवेगळ्या ठिकाणी आंदोलन असे प्रकार महाविकास आघाडी सरकार मधील पक्षांनी सुरू केले आहेत. या पार्श्वभूमीवर एम आय टी महाविद्यालयाच्या मैदानावर होणाऱ्या पंतप्रधानाच्या कार्यक्रमात येणाऱ्या नागरिकांना काळया रंगाच्या मास्क, टोपी, शर्ट घालून येण्याला मज्जाव करण्यात आला. त्यामुळे काढून टाकण्यात आलेले मास्क, टोपी यांचा खच सुरक्षा रक्षकां जवळ पडले होते.
पंतप्रधानाच्या प्रोटोकॉल प्रमाणे काळया रंगाच्या वस्तू नेण्याला परवानगी नसते. त्यामुळे त्या गोष्टी पोलिसांनी कडकपणे तपासायला सुरुवात केली. अनेकांचे मास्क काळया रंगाचे होते, तर काहींनी ऊन लागू नये म्हणून घातलेल्या टोप्या काळया रंगाच्या होत्या. त्या पोलिसांनी काढायला लावल्या. त्या खिशात ठेवून नेण्यालाही परवानगी नाकारण्यात आली.
त्यामुळे त्या गोष्टी नाईलाजाने कचऱ्याच्या टोपलीत टाकाव्या लागत होत्या. यामुळे किमान तीन ते चार कचऱ्याच्या मोठ्या बकेट भरून या गोष्टी जमा झाल्या. मास्क शिवाय कोणाला आत जाऊ देणेही नियमबाह्य आहे त्यामुळे त्यांना तोंडाला रुमाल बांधून जाण्याला परवानगी देण्यात आली. मात्र ज्यांच्याकडे ही देखील सोय नव्हती त्यांना सभास्थळी जाता आले नाही.
महिलांची झाली पंचाईत – अनेक महिला कार्यकर्त्यांनी सोबत आणलेली पर्स सभास्थानी नेण्याला परवानगी नाकारण्यात आली. त्यामुळे अनेक महिलांची पंचाईत झाली. आजूबाजूला असलेल्या घरांमध्ये पर्स ठेवण्याची विनंती अनेक महिलांनी तेथील रहिवाशांना केली. काही जणांनी त्याला परवानगी दिली तर काहींनी नाकारली. मात्र पर्स सुरक्षित राहील ना याची चिंता मात्र महिलांमध्ये होती.