पुणेकरांकडून अपारंपरिक ऊर्जेचा वापर वाढला
पुणे – शहरात अपारंपरिक उर्जेचा वापर वाढत असून, गेल्या वर्षभरात सुमारे 1 कोटी 82 लाख युनिट वीज वाचवली बचत आहे. गृहसंकुलांमध्ये सौरऊर्जा, गांडूळखत आणि पर्जन्य जलसंचय हे प्रकल्प राबवणाऱ्यांना महापालिकेने मिळकत करात सूट दिल्याने हा परिणाम झाल्याचे पर्यावरण अहवालात म्हटले आहे.
अपारंपरिक उर्जास्रोतांचा वापर वाढावा आणि प्रदूषण कमी करण्यासाठी वरील तीनपैकी एक प्रकल्प राबवणाऱ्या मिळकतींना मिळकत करात महापालिकेतर्फे पाच ते दहा टक्के सवलत देण्यात येते. 2019 मध्ये 49,838 सोलर वॉटर हिटरच्या वापरामुळे वर्षभरात विजेची अंदाजे 1.82 कोटी युनिटाची बचत झाली आहे. महापालिकेने देखील विविध इमारतींवर एकूण 1309.74 किलो वॅट सौर ऊर्जा निर्मिती प्रकल्प उभे केले आहे. यामुळे वीजबिलात अंदाजे सव्वा कोटी रुपयांची बचत होईल, असे अहवालात नमूद केले आहे. वीज बचतीसाठी महापालिकेने आजपर्यंत 87 हजार एलईडी फिटिंग बसवल्याचे अहवालात म्हटले आहे.