पुणे – संशयित म्हणून क्वारंटाइन केलेल्या व्यक्तींचा करोना रिपोर्ट पॉझिटिव्ह येण्याचे प्रमाण कमी आहे. मात्र, अहवाल निगेटिव्ह आला म्हणून बिनधास्तपणा नको. हा निगेटिव्ह अहवाल दुसऱ्या किंवा चौथ्या दिवशी पॉझिटिव्ह येण्याची शक्यता नाकारता येत नाही. तसेच, एखाद्या व्यक्तीचा नमुने घेताना चूक झाली, तरीही अहवाल वेगळा येऊ शकतो. त्यामुळे करोनापासून दूर राहायचे असेल, तर फिजिकल डिस्टन्स आणि खबरदारी घेतली पाहिजेच.
शहरात बाधितांपैकी 70 टक्के व्यक्तींना करोनाची लक्षणे दिसून आली नाहीत. मात्र, त्यांचा अहवाल पॉझिटिव्ह आला आहे. राज्य शासनाने “एनआयव्ही’सह ससूनमध्ये नवीन नमुने तपासणी प्रयोगशाळा सुरू करण्यास परवानगी दिली. मात्र, बाधितांची संख्या दुपटीने वाढल्यामुळे अन्य खासगी रुग्णालयांसह काही तपासणी लॅबलाही कोविड-19 ची तपासणी करण्यास परवानगी दिली.
त्यामुळे या आधी दिवसाला 300 ते 400 नमुने तपासणी होत होते, ते आज 1,200 हून अधिक तपासणी होत आहे. त्यामुळे बाधितांची संख्याही वाढली आहे. त्यामध्ये एखादा अहवाल चुकीचा येणे म्हणजे प्रादुर्भाव वाढण्याची भीती असाच आहे. त्यामुळे हे अनुभव पाहता पुणेकरांनी करोनापासून बचावासाठी फिजिकल डिस्टन्सिंग आणि स्वच्छता पाळणे आवश्यक आहे.
समोर आलेले प्रकरण धक्कादायक…
हिंजवडीतील एका गर्भवतीला ताप आणि सर्दीचा त्रास झाल्यामुळे खासगी रुग्णालयात दाखल केले. तिची कोविड-19 तपासणी केली असता, ती पॉझिटिव्ह आली. त्यानंतर पुण्यातील एका रुग्णालयात तिचे नमुने तपासणीसाठी पाठविले असता, पहिला रिपोर्ट निगेटिव्ह आला. मात्र, दुसरा रिपोर्ट पॉझिटिव्ह आल्याची माहिती अधिकृत अधिकाऱ्यांनी दिली. या प्रकारामुळे अनेक शंका उपस्थित झाल्या असून, नक्की तपासणी व्यवस्थित होते का? एकाच व्यक्तीचे वेगवेगळे अहवाल कसे? असे अनेक प्रश्न उपस्थित होत आहेत.
तज्ज्ञ डॉक्टर म्हणतात…
संशयिताचा पहिला अहवाल करोना निगेटिव्ह आणि नंतरचा अहवाल पॉझिटिव्ह असे होऊ शकते. त्यामध्ये अनेक शक्यता असू शकतात. नमुना चुकीच्या पद्धतीने घेतला असेल किंवा सुरुवातीच्या नमुन्यामध्ये तशी लक्षणे नसावीत. करोनाचे विषाणू शरीरावर उशिरा परिणाम करतात. त्यामुळे नमुन्यात दिवसागणिक बदल होऊ शकतो.
कोविड-19 तपासणीसाठी कोणते नमुने घेतात
करोना विषाणू संसर्ग तपासणीसाठी व्यक्तीच्या घसा किंवा नाकातील स्राव घेतला जातो. त्याचबरोबर रक्ताचे नमुने घेऊनही याची तपासणी होऊ शकते. मात्र, त्याचा अहवाल येण्यास उशीर होण्याची शक्यता आहे. त्यामुळे आजाराचे तत्काळ निदान होण्यासाठी हे दोन प्रकारचे स्राव घेतले जातात.