नाशिक – राज्यात कॉंग्रेसची परिस्थिती अत्यंत खराब आहे. कॉंग्रेसला येत असलेल्या पराभवांमुळे त्या पक्षाचे प्रदेशाध्यक्ष नाना पटोले यांना नैराश्‍य आले आहे. या नैराश्‍यातून ती अशी नाना वक्तव्ये करत आहेत. आता पराभवाच्या मानसिक धक्‍क्‍यातून सावरता सावरता त्यांना जळी, स्थळी, काष्ठी, पाषाणी पंतप्रधान नरेंद्र मोदी दिसायला लागले आहेत. मात्र, वैयक्तिक टीका करणे ही आपल्या राज्याची आणि देशाची संस्कृती नाही. पटोले यांना प्रसिद्धीच्या हव्यासाचा नवीन छंद जडला दिसतोय. त्यातून ते अशी वक्तव्ये करत आहेत, अशा शब्दांत केंद्रीय मंत्री डॉ. भारती पवार यांनी पटोले यांना लक्ष्य केले.
भारती पवार म्हणाल्या की, राज्यातील प्रश्नांना समोरे न जाता पळ काढण्यासाठी पटोले यांच्याकडून मोदींवर टीका केली जात आहे. मात्र, यातून नाना पटोले यांच्या बुद्धिमतेची दिवाळखोरी समोर आली आहे.
पटोले यांच्यावर गुन्हा का दाखल होत नाही, असा प्रश्नही त्यांनी केला. आमच्या नेत्यांना वेगळा न्याय, नाना पटोले यांना एक न्याय. पटोले यांना असे वक्तव्य करण्यासाठी परवाना काढणाऱ्यांचे काय, म्हणत त्यांनी कॉंग्रेस श्रेष्ठींना आरोपीच्या पिंजऱ्यात उभे केले.
