करोना मदतीसाठी अवघे 450 जण सरसावले
महापालिकेला हवाय नागरिकांच्या मदतीचा हात
पुणे – शहरातील गणेशोत्सव आणि सार्वजनिक गणेशोत्सव मंडळे सक्रिय सामाजिक कार्यकर्ते घडवणारे विद्यापीठ समजले जातात. त्यामुळे पुणे शहर हे कार्यकर्त्यांचे शहर म्हणून ओळखले जाते. मात्र, करोना काळात शहरातील करोना नियंत्रणाच्या कामासाठी महापालिकेस प्रत्येक प्रभागस्तरावर स्वयसेवकांची गरज असताना, त्यासाठी पुढे येण्यास कोणीच तयार नसल्याचे समोर आले. मागील दोन महिन्यांत सुमारे 450 जणांनी स्वयंसेवक म्हणून कामाची तयारी दर्शवली असून त्यातही महाविद्यालयीन विद्यार्थी, स्वयंसेवी संस्थांच्या कार्यकर्त्यांचा सहभाग अधिक आहे.
शहरात करोनाबाधितांची संख्या 66 हजारांवर गेली आहे. त्यामुळे महापालिकेकडून या साथीवर नियंत्रण मिळवण्यासाठी वेगवेगळ्या पद्धतीने नियोजन सुरू केले आहे. त्यात, बाधितांच्या संपर्कात येणाऱ्या व्यक्तींचे ट्रेसिंग, त्यांना उपचारासाठी दाखल करणे याचा समावेश आहेच.
याशिवाय घरोघरी सर्वेक्षण, तापाचे रुग्ण शोधणे, ज्येष्ठ नागरिकांची माहिती संकलित करणे असे कामही हाती घेतले आहे. त्यासाठी कर्मचाऱ्यांची नियुक्ती केली असली, तरी त्याला फारसा प्रतिसाद मिळत नसल्याचे समोर आले आहे. घरी सर्वेक्षणासाठी आलेले लोक अनोळखी असल्याने तसेच आजाराच्या भीतीने नागरिक माहिती लपवत आहेत. त्यामुळे प्रशासनाला करोना नियंत्रणाच्या कामात अपेक्षित यश नसल्याचे चित्र आहे.
पोलिसांसोबत काम करण्याची तयारी
एका बाजूला महापालिकेच्या सर्वेक्षण तसेच मदतीसाठी कार्यकर्ते पुढे येत नसताना पोलिसांनी आपल्या ठाण्यांच्या हद्दीत विशेष पोलीस अधिकारी (एसपीओ) म्हणून नियुक्त केले होते. त्यासाठी मोठ्या प्रमाणात कार्यकर्ते तयार झाले होते. तर त्यातील काहींनी महापालिकेसोबत काम करण्याची तयारी दर्शविली होती. मात्र, प्रत्यक्षात अनेक जण येत नसल्याचे चित्र आहे.
स्थानिक कार्यकर्त्यांचीच गरज का?
गणेश मंडळ तसेच इतर सार्वजनिक उपक्रम आणि स्थानिक लोकप्रतिनिधींच्या माध्यमातून सक्रिय असलेल्या स्थानिक कार्यकर्त्यांना आपल्या परिसराची सर्व माहिती असते. एवढेच नाही, तर आपल्या भागात कोणत्या कुटुंबात किती व्यक्ती आहेत, किती ज्येष्ठ नागरिक, आजारी व्यक्ती किती, सोसायट्यांचे अध्यक्ष आणि तिथे राहणारे नागरिक कोण आहेत? याचीही माहिती असते. तसेच या नागरिकांचाही काही ना काही कारणाने या कार्यकर्त्यांशी संपर्क आलेला असतो. त्यामुळे नागरिकही त्यांना ओळखतात. त्यामुळे सर्वेक्षणाच्या कामात हे कार्यकर्ते प्रशासन आणि नागरिकांमधील मोठा दुवा ठरू शकतात.
आपल्या भागातील ज्येष्ठांची माहिती त्यांच्या तपासणीसाठी पथके घेऊन जाण्यास या कार्यकर्त्यांची मोठी मदत होऊ शकते. मात्र, या कामासाठी केवळ महाविद्यालीयन विद्यार्थी समोर येत असून त्यांचीही संख्या नगण्य आहे. तसेच त्यांना शहराची, परिसराची माहिती नसल्याने अनेक मर्यादा येतात. त्यामुळे स्थानिक कार्यकर्तेच महत्त्वाची भूमिका बजावू शकतात.