नवी दिल्ली : अतिमहत्वाच्या व्यक्तींसाठी कोट्यवधी रुपयांच्या ऑगस्टा वेस्टलॅन्ड हेलिकॉप्टर खरेदी गैरव्यवहार प्रकरणातील करचुकवेगिरी संदर्भात प्राप्तीकर विभागाने गुरुवारी दिल्ली आणि पुण्यामध्ये वेगवेगळ्या ठिकाणी छापे घातले.
या प्रकरणातील आरोपी आणि त्यांच्या नातेवाईकांशी संबंधित वेगवेगळ्या ठिकाणी तसेच पुण्यातील प्रथितयश उद्योजकाशी संबंधित ठिकाणांवर हे छापे घातले गेले, असे अधिकाऱ्यांनी सांगितले.
एकूण 30 ठिकाणांवर प्राप्तीकर विभागाच्या पथकांनी स्थानिक पोलिसांच्या सहकार्याने हे छपे घातले, असेही अधिकारी म्हणाले. ऑगस्टा वेस्टलॅन्ड हेलिकॉप्टर गैरव्यवहार प्रकरणी अटक करण्यात आलेला आरोपी राजीव सक्सेनाने दिलेल्या माहितीच्या आधारे दोघाजणांविरोधात हे छापे घातले गेले. सक्सेनाला गेल्या वर्षी दुबईवरून भारतात आणण्यात आल्यानंतर सक्तवसुली संचलनालयाने त्याला अटक केली होती.