पुणे – करोना काळानंतर बांधकाम क्षेत्रातील मंदीसदृश्य वातावरण आता वेगाने निवळताना दिसत आहे. 2022-23 या आर्थिक वर्षांच्या अखेरच्या तीन महिन्यांत म्हणजेच 2023च्या जानेवारी ते मार्च या महिन्यांत घरांच्या विक्रीत मोठी वाढ नोंदवण्यात आली आहे. देशात गतवर्षीच्या तुलनेत 14 तर पुणे शहरात घरांची विक्रीत तब्बल 42 टक्क्यांनी वाढली आहे.
“अनारॉक रिसर्च’ने या संस्थेने पुणे शहरास मुंबई, हैदराबाद, बंगळुरू, दिल्ली, चेन्नई आणि कोलकता या सात मोठ्या शहरांतील पाहणीच्या आधारे घरांच्या विक्रीचा अहवाल जाहीर केला आहे. यानुसार सात मोठ्या शहरात जानेवारी 2023 ते मार्च या तीन महिन्याच्या कालावधीत एकूण 1 लाख 13 हजार 770 घरांची विक्री झाली आहे. गतवर्षी हेच प्रमाण केवळ 99 हजार 500 घरांची विक्री असे होते. मुंबई आणि पुणे शहराचा एकूण घरांच्या विक्रीत जवळपास निम्मा म्हणजे 48 टक्के इतका आहे. तर, केवळ पुणे शहरात घरांच्या विक्रीत 42 टक्के अशी मोठी समाधानकारक वाढ झाल्याची नोंद आहे.
पुण्यात घरांच्या किंमती स्थिर…
जानेवारी ते मार्च या तीन महिन्यांत घरांच्या किंमती 8 टक्क्यांनी वाढल्याचे अहवालात म्हटले आहे. यामध्ये मुंबई आणि बंगळुरू शहरातील घरांच्या किंमतीत सर्वाधिक 9 टक्के वाढ झाली तर पुण्यात घरांच्या किंमती तुलनेने स्थिर असल्याचे म्हटले आहे. नवीन गृहप्रकल्पांची संख्याही तेवढ्याच प्रमाणात वाढत आहे. ग्राहकांसाठी विक्रीसाठी वेळेत उपलब्ध होणाऱ्या घरांची संख्याही मागणीच्या प्रमाणात अधिक आहे. प्रमुख सात मोठ्या शहरांत 6 लाख 27 हजार घरे विक्रीसाठी उपलब्ध आहेत. प्रकल्प पूर्ण होऊनही विक्री न झालेल्या घरांची टक्केवारी अवघी एक टक्के असल्याचे आपल्या अहवालात म्हटले आहे.