पुणे – अभिनेता विक्रम गोखले यांच्या प्रकृतीबाबतची मोठी अपडेट समोर आली आहे. आज दीनानानाथ मंगेशकर रुग्णालयाचे जनसंपर्क अधिकारी शिरीष याडगीकर यांनी विक्रम गोखले यांच्या प्रकृतीमध्ये आश्वासक सुधारणा होत असल्याची माहिती दिली. गेल्या काही दिवसांपासून विक्रम गोखले यांच्यावर रुग्णालयात उपचार सुरु आहेत.
विक्रम गोखले यांच्या प्रकृतीत आश्वासक सुधारणा होत आहे. त्यासोबत ते डोळे उघडत असून हात पाय हलवत आहेत अशी माहिती याडगीकर यांनी दिली. तसेच पुढील ४८ तासात त्यांचा व्हेंटिलेटर सपोर्ट निघू शकेल असे वाटत असून त्यांचा रक्तदाब व ह्रदयाची क्रिया स्थिर आहे अशी महत्वाची अपडेट आज सकाळी रुग्णालयाकडून देण्यात आली.
पत्नीने दिली होती महत्वाची माहिती
काल माध्यमांना माहिती देताना विक्रम गोखले यांच्या पत्नी वृषाली गोखले यांनी सांगितले होते की,’बुधवारी त्यांची प्रकृती खालावली आणि ते कोमात गेले. त्यांचे विविध अवयवांनी काम करणे बंद केले आहे. अफवांना बळी पडू नका. डॉक्टर प्रयत्न करत आहे.’ असं वृषाली गोखले म्हणाल्या होत्या.