वडूज – मायणी, ता. खटाव येथील पिराजी विष्णू भिसे यांचा मृत्यू झाला असतानाही, ते जिवंत असल्याचे भासवून जमिनीचे बोगस दस्तऐवज तयार करण्यात आले होते. या प्रकरणी अटक करण्यात आलेल्या महेश बोराटे व दत्तात्रय घुटुगडे यांना वडूज न्यायालयाने पाच दिवसांची पोलीस कोठडी सुनावली आहे.
भिसे कुटुंबीयांची फसवणूक केल्याप्रकरणी आ. जयकुमार गोरे, दत्तात्रय कोंडिबा घुटुगडे (विरळी, ता. माण), महेश पोपट बोराटे (बिदाल, ता. माण) व अन्य दोन जणांच्या विरोधात महादेव पिराजी भिसे यांनी दहिवडी पोलीस ठाण्यात फिर्याद नोंदवली होती. त्यानुसार संशयितांवर फसवणूक प्रकरणी भादंवि कलमान्वये आणि ऍट्रॉसिटी कायद्यांतर्गत गुन्हा दाखल करण्यात आला आहे.
बोगस दस्तऐवज तयार करून फसवणूक केल्याप्रकरणी संजय काटकरला पोलिसांनी या आधीच अटक केली आहे. त्यानेच भिसे यांच्या नावाने सह्या केल्याचा आरोप आहे. न्यायालयाने त्याला 11 दिवसांची पोलीस कोठडी सुनावली होती. दरम्यान, आ. गोरे यांचे सहकारी महेश बोराटे व दत्तात्रय घुटुगडे यांनाही अटक केल्यानंतर वडूज न्यायालयात हजर करण्यात आले. त्यावेळी दोघांनाही पाच दिवसांची पोलीस कोठडी सुनावण्यात आली.