नवी दिल्ली – बॅंक कर्ज घोटाळ्याप्रकरणी सीबीआयने चेन्नईतील सुराणा कॉर्पोरेशन आणि कंपनीच्या संचालकांविरोधात गुन्हा दाखल केला आहे. स्टेट बॅंक ऑफ इंडियाच्या नेतृत्वाखालील सहा बॅंकांकडील तब्बल 2.930 कोटी रुपयांच्या कर्ज प्रकरणी हा गुन्हा दाखल करण्यात आला आहे.
सुराणा कॉर्पोरेशनचे व्यवस्थापकीय संचालक विजयराज सुराणा आणि अन्य काही जणांनी मिळून संगनमताने हा घोटाळा केला आणि त्यामुळे स्टेट बॅंक ऑफ इंडिया आणि इतर बॅंकांचे मोठे आर्थिक नुकसान झाले, असे “एसबीआय’ने म्हटले आहे. सीबीआयने 2012 मध्ये कंपनीतून जप्त केलेले 100 किलो सोने कंपनीच्याच सील करण्यात आलेल्या कपाटांमध्ये ठेवण्यात आले होते. मात्र ते सोने तेथून बेपत्ता झाले असल्याची तक्रार अलिकडेच सुराणा समूहाकडून करण्यात आली होती.
सीबीआयने 2012 मध्ये सुराणा कॉर्पोरेशनच्या चेन्नईतील कार्यालयांमध्ये तपास करून 400.47 किलो सोने आणि सोन्याचे दागिने जप्त केले होते. “मिनरल्स ऍन्ड मेटल्स ट्रेडिंग कॉर्पोरेशन ऑफ इंडिया’ला सोने आणि चांदीच्या आयातीमध्ये सुराणा कॉर्पोरेशनकडून अतिरिक्त झुकते माप दिले गेल्याचा आरोपही सीबीआयने केला होता. सील करून ठेवलेली सुरक्षा कपाट 27 ते 29 फेब्रुवारी दरम्यान बॅंक अधिकाऱ्यांच्या उपस्थितीत उघडले गेले तेंव्हा जप्त केलेल्या सोन्यामध्ये 103 किलो सोने कमी होते.
कंपनीला बॅंकांना एकूण 3,161.91 कोटी रुपयांचे देणे होते. मात्र सीबीआयकडून 232 कोटी रुपयांचे सोने खुले केल्यानंतर ही रक्कम 2,930 कोटी रुपयांपर्यंत खाली आली, असे सीबीआयने दाखल केलेल्या एफआयआरमध्ये म्हटले आहे.