श्रीनिवास वारुंजीकर/ पुणे: संपूर्ण जगभर “करोना’ विषाणूमुळे “कोव्हिड-19′ या संसर्गजन्य रोगाचा प्रसार होत आहे. या महाआपत्तीला प्रत्येक देश आपापल्या पद्धतीने सामोरा जात आहे. मात्र, या सर्व परिस्थितीत संयुक्त राष्ट्रांच्या सदस्य देशांतील 19 राष्ट्रांच्या प्रमुख महिला असून, जर्मनी आणि बेल्जियम वगळता अन्य 17 राष्ट्रप्रमुखांनी आपापल्या देशात करोनाच्या समस्येवर यशस्वीपणे मात केल्याचे दिसून येत आहे. नामिबियात करोनाचा एकही मृत्यु नसून बार्बाडोस आणि स्लोव्हाक रिपब्लिकमध्ये अनुक्रमे दोन व तीन जण “करोना’ने मरण पावले आहेत. एक नजर या उत्तम आपत्ती व्यवस्थापन असलेल्या राष्ट्रप्रमुखांच्या कामगिरीवर…
1. बेल्जियम – सोफी विल्यम्स
महिला राष्ट्रप्रमुख असलेल्या देशांत “करोना’बाधितांची सर्वाधिक संख्या बेल्जियममध्ये आढळली असून आज अखेर या देशात 24,983 बाधित व्यक्तींपैकी अवघे 516 बरे झाले, तर 2523 जणांना प्राण गमवावे लागले. पंतप्रधान सोफी विल्यम्स यांना परिस्थिती हाताळताना कठोर निर्णय घेता आले नाहीत. आणि जेव्हा कठोर निर्णय घेतले त्यावेळी बाधितांचा आकडा बराच फुगला होता. त्यामुळे मृतांची संख्याही अडीच हजाराच्या पुढे गेली.
2. जर्मनी – एंजेला मार्कल
जर्मनीच्या एंजेला मार्कल या युरोपातील एक शक्तीशाली नेत्या मानल्या जातात. मात्र, जर्मनीमध्ये आलेले निर्वासित आणि अन्य धर्मियांची वाढती संख्या यामुळे देशाचे आपत्ती व्यवस्थापन फार मोठा चमत्कार दाखवू शकले नाही. मार्कल यांनी प्राथमिक आरोग्य सुविधांवर भर द्यायचे ठरवले, त्यावेळी बाधितांचा आकडा एक लाखाच्या पुढे गेला होता. आजवर तिथे 32,814 रुग्ण बरे झाले तर 2280 जणांना प्राण गमवावे लागले.
3. जॉर्जिया – सालोम झोरुबिचविली
जॉर्जियामध्ये “करोना’च्या आपत्तीचे गांभीर्य समजायला वेळ लागला. बाधितांचा आकडा दहा हजाराच्या पुढे जात असताना सरकारने सोशल डिस्टन्सिंगचे उपाय योजले. इथे आधुनिक औषाधोपचारांचा तुटवडा असल्याने रुग्ण बरे होण्याची संख्या शून्य आहे. अशातच सरकारने औषधांच्या उपलब्धतेसाठी कठोर पावले न उचलल्याने मृतांचा आकडा 370 च्या जवळ गेला.
4. डेन्मार्क – मेटे फ्रेड्रिक्सन
डेन्मार्कच्या पंतप्रधान मेटे फ्रेड्रिक्सन या सुरुवातीपासूनच “करोना’बाबत सजग होत्या. त्यांनी तातडीने आरोग्य सेवांच्या बळकटीकरणावर भर दिला आणि “करोना’च्या आपदेला सामोरे जाण्यासाठी सज्ज राहिल्या. मात्र, नागरिकांना समस्येचे गांभीर्य समजायला उशीर झाला. डेन्मार्कमध्ये 5402 बाधितांपैकी 1621 जण बरे झाले पण मृतांची संख्यान् 218 राहिली. नागरिकांनी सहकार्य केले असते, तर ही संख्या कमी दिसली असती.
5. नॉर्वे – एल्ना सोलबर्ग
युरोपाच्या अती उत्तरेकडचे राष्ट्र असलेल्या नॉर्वेमध्ये “कोव्हिड19′ चे सर्वाधिक बळी असतील असा अंदाज होता, कारण या देशाचे तापमान वर्षात किमान आठ महिने तरी सामान्य तापमानापेक्षा कमी असते. मात्र पंतप्रधान एल्ना सोलबर्ग यांनी अचूक नियोजन करत, उत्तम औषधोपचार उपलब्ध करत संपूर्ण समस्येवर यशस्वीपणे मात केली. इथल्या 6048 रुग्णांपैकी बरे होऊन घरी गेलेल्यांची संख्या शून्य असली तरी मृतांची संख्या 103 पर्यंत नियंत्रित ठेवण्यास आरोग्य सेवेला यश आले.
6. ग्रीस – कॅटरीना साकेरापौलू
ग्रीसमध्ये स्थलांतरीत नागरिकांची मोठी समस्या आहे. सीरियातील सर्वाधिक स्थलांतरीत युरोपातील कोणत्या देशात गेले असतील तर ते ग्रीसमध्ये. “करोना’ची चीनमधील स्थिती पाहता राष्ट्राध्यक्ष कॅटरीना साकेरापौलू यांनी सर्वाधिक भर दिला तो सोशल डिस्टन्सिंगवर. त्यामुळे सर्वच प्रकारच्या संसर्गजन्य आजारांच्या फैलावाला प्रतिबंध बसला. एकूण 1832 बाधितांपैकी 269 रुग्ण बरे होऊन घरी गेले आणि 81 जण प्राणास मुकले.
7. फिनलंड – साना मरिन
युरोपातील आणखी एक थंड हवेचे राष्ट्र म्हणून फिनलंड ओळखळे जाते. इथेही कमी तापमानामुळे “करोना’च्या प्रादुर्भावाचा धोका होता. मात्र साना मरिन या दूरदर्शी राष्ट्रप्रमुखाच्या नेतेपदामुळे फिनलंडमध्ये “कोव्हिड19’ची बाधा असलेले 2605 रुग्ण आढळून आले. इथेही बरे झालेल्या रुग्णांची संख्या शून्य असली तरी मृतांची संख्याही कमी म्हणजे 40 एवढीच आहे.