पुणे – मंगळवारी रात्री झोडपल्यानंतर बुधवारी दिवसभर पावसाने विश्रांती घेतली. मात्र, रात्री 9च्या सुमारास तुफानी पावसाने पुणेकरांना जेरीस आणले. नॉनस्टॉप सुरू असलेल्या या पावसाने शहरासह उपनगरांत मोठे नुकसान केले. यात अनेक घरांत पाणी शिरले असून रस्तेदेखील बंद करण्यात आले.
बुधवारी सायंकाळच्या सुमारास विजांच्या कडकडाटासह पावसाला सुरुवात झाली आणि काही क्षणांतच पावसाने रौद्र रूप धारण केले. अखंड वर्षावृष्टीमुळे पर्वती पायथ्याला घोट्यापेक्षा जास्त पाणी होते. तर, टिळक रस्त्याही पाण्याखाली गेला. विशेषत: उपनगरांत बऱ्याच ठिकाणी उतार असल्याने पाण्याचा प्रवाह जोरदार होता. मार्केटयार्ड पोस्ट ऑफिस चौकात जवळपास 2 फूट पाणी साचले. तर, दांडेकर पूल येथील ओढ्याशेजारील घरांमध्ये पावसाचे पाणी शिरले. खडकवासला परिसरात कोल्हेवाडीतील बिल्डिंगमध्ये पाणी शिरल्याचे वृत्त रात्री उशिरा आले. धायरी परिसरातील नवले पुलाखाली पाणी साचल्याने वाहतूक ठप्प झाली होती. शिवाय कोथरूड, बावधनसह भूगाव परिसरातही पावसाचा जोर मोठा होता.
पावसाच्या या तडाख्याने महावितरण यंत्रणेलाही मोठा फटका बसला असून अनेक ठिकाणी वीजवाहिन्यांचे नुकसान झाले आहे. त्यामुळे धनकवडी, पर्वती, सहकारनगर, आंबेगाव, मुंढवा, हडपसरच्या काही भागांसह, कात्रज, वडगाव शेरी, येरवडा, विश्रांतवाडी परिसरात बत्ती गुल झाली.
खडकवासला प्रकल्पाच्या चारही धरणांत पावसाचा जोर बुधवारी कायम होता. त्यामुळे सकाळच्या सुमारास विसर्ग सुरू करण्यात आला. त्यानंतर रात्री उशिरा त्यात वाढ करून 4,280 क्युसेकने विसर्ग सुरू करण्यात आला.
वारजे-कोथरूड रस्ता, पूल जाम
कर्वेनगर येथील उड्डाण पुलाखाली गुडघाभर पाणी साठल्याने पीएमपी बसेससह दुचाकी आणि चारचाकी वाहने बंद पडली. त्यामुळे दुचाकीस्वारांची दमछाक झाली. कर्वेनगर पुलाखाली वाहनांच्या मोठ्या रांगा लागल्याचे दिसून आले. तर, पुलाखाली आणि पुलावरही वाहतूक जाम होती.
दरड कोसळली, रस्ता बंद
अविश्रांत कोसळणाऱ्या या पावसामुळे नवीन कात्रज बोगद्याजवळ रस्त्यावर दरड कोसळली आहे. त्यामुळे खबरदारीचा उपाय म्हणून रात्री साडेदहाच्या सुमारास हा रस्ता वाहतुकीसाठी बंद करण्यात आला.
पाऊस पडण्याचे कारण काय?
पुणे आणि पुण्याच्या दक्षिण-पूर्व भागावर सध्या 9-12 किमी उंचीचे ढग तयार झाले आहेत. हे मुंबई येथील वेधशाळेच्या रडारवर दिसून येत आहे. सुमोर 3 ते 6 किमी उंचीपर्यंत त्यांची घनता जास्त आहे. सध्या पुण्यात सुरू असलेला पाऊस या जास्त घनतेच्या ढगांमुळे आहे, असे हवामानविषयक अभ्यासकांनी सांगितले.