जुन्नर – संपूर्ण राज्यात कॉंग्रेस व राष्ट्रवादीच्या नेत्यांचा सेना-भाजप युतीमध्ये मोठ्या संख्येने प्रवेश होत असून जुन्नर तालुक्यातही आदिवासी भागांतील अनेक नेते शिवसेनेत प्रवेश करणार आहेत.
पीपल्स फेडरेशन ऑफ इंडियाचे अध्यक्ष व कॉंग्रेस आयचे पदाधिकारी मारुती वायाळ, कुकडेश्वर हिरडा कारखान्याचे अध्यक्ष काळू शेळकंदे, सामाजिक कार्यकर्ते दत्ता गवारी, सरपंच बुधा गवारी, आदींनी शिवसेनेचे कार्याध्यक्ष उद्धव ठाकरे यांची मागील आठवड्यात मातोश्रीवर भेट घेतली होती. या प्रमुख नेत्यांसह अनेक आदिवासी सरपंच व कार्यकर्ते यांचा येत्या 13 तारखेला कुकडेश्वर येथे आयोजित मेळाव्यात मान्यवरांच्या उपस्थितीत प्रवेश होणार असल्याची माहिती मारुती वायाळ यांनी दिली.
कुकडेश्वर मंदिराच्या कळसाचे काम, हिरडा कारखाना, दाऱ्याघाट आदी प्रश्न मार्गी लावण्याचे आश्वासन ठाकरे यांनी याप्रसंगी दिले. यावेळी शिवसेनेचे उपनेते शिवाजीराव आढळराव पाटील, आमदार शरद सोनवणे, जिल्हाप्रमुख माऊली कटके, तालुकाप्रमुख माऊली खंडागळे, संपर्कप्रमुख दिलीप बामणे, पंकज गावडे आदी उपस्थित होते. गुरुवारी (दि. 8) वायाळ व शेळकंदे यांनी त्यांच्या कॉंग्रेस (आय) पक्षातील पदाचे राजीनामे वरिष्ठांकडे पाठविले आहेत. या भागातील शिवसेनेचे जिल्हा परिषद सदस्य देवराम लांडे हे असून या आदिवासी नेत्यांचे प्रवेश झाल्यावर या भागांतून शिवसेनेला येत्या विधानसभेत मोठ्या प्रमाणावर मतदान होण्याची शक्यता आहे. नुकत्याच झालेल्या लोकसभा निवडणुकीत राष्ट्रवादी कॉंग्रेसला या पट्ट्यातून भरभरून मतदान झाले होते.
कुकडेश्वर येथील मेळाव्यास विविध मतदारसंघातील आदिवासी आमदार व नेते उपस्थित राहणार असून याप्रसंगी उपस्थित 18 ते 50 वयोगटांतील बंधू-भगिनींचा 2 लाख रुपयांचा विमा मोफत काढण्यात येणार आहे.
– शरद सोनवणे, आमदार जुन्नर