राजकीय पुढाऱ्यांना गावबंदी; शिवरुपराजे खर्डेकरांकडून नारायण राणेंच्या वक्तव्याचा निषेध
फलटण – आसू (ता. फलटण) येथे राजकीय पुढाऱ्यांना गावबंदी आणि मतदानावर बहिष्कार टाकण्याचा निर्णय सकल मराठा समाजाच्यावतीने घेण्यात आला आहे. येथून पुढे कोणत्याही राजकीय पक्षाच्या पदाधिकाऱ्यांना फिरू देणार नसल्याचा इशाराही सकल मराठा समाजाच्या वतीने देण्यात आला.
आज सकाळी आसू बसस्थानकासमोर सकल मराठा समाजातर्फे बैठकीचे आयोजन करण्यात आले होते. त्यावेळी हा निर्णय घेण्यात आला. आम्ही मराठा योद्धा मनोज जरांगे पाटील यांच्याबरोबर कायमस्वरूपी असून त्यांच्या भूमिकेला आम्ही शेवटपर्यंत समर्थन देणार आहोत. आम्ही मराठा आरक्षणासाठी काहीही करायला तयार असल्याचे मत मराठा समाजाच्या युवकांतर्फे यावेळी व्यक्त करण्यात आले.
आसू गावातील सकल मराठा समाजाने मतदानावर बहिष्कार टाकला असून आम्ही फलटण तालुक्यातील सर्व सकल समाज मनोज जरांगे पाटलांच्या भूमिकेला समर्थन करणार आहोत. आमच्या अनेक पिढ्या बरबाद झाल्या असून, येथून पुढच्या पिढ्यांच्या भवितव्यासाठी या आरक्षणाच्या लढाईत आम्ही सर्वांबरोबर असणार व मराठा आरक्षणाचा लढा आम्ही लढवण्यासाठी सज्ज असून येत्या 25 तारखेला फलटण तालुका सकल मराठा समाजातर्फे बैठकीचे आयोजन करण्यात आले असल्याचे माऊली सावंत यांनी सांगितले.
पूर्वीचा आणि आत्ताचा मराठा समाज यामध्ये खूप बदल झाला असून आज नोकरी, शिक्षणामध्ये आरक्षणाची अत्यंत गरज आहे. पूर्वी समाजामध्ये गरज नव्हती. पण आता ती गरज महत्वाची आहे. आम्ही छत्रपती शिवरायांचे विचार मांडणारे असून मराठा समाजामध्ये दुही निर्माण करण्याचा प्रयत्न जर राजकीय मंडळी करत असतील तर त्यांना त्यांची जागा दाखवून देण्याचा इशारा शिवरूपराजे खर्डेकर यांनी दिला.
सकल मराठा समाजाच्या वतीने राजकीय पुढाऱ्यांना गावबंदी व मतदानावर बहिष्कार असा मोठा फलक एसटी बस स्थानकासमोर लावण्यात आला आहे. यावेळी मोठ्या संख्येने मराठा समाजातील युवक उपस्थित होते. स्वामी साबळे यांनी आभार मानले.
नारायण राणेंचे वक्तव्य चुकीचे
सकल मराठा समाजाविषयी नारायण राणे यांनी केलेले वक्तव्य चुकीचे आहे. कोंबडी चोरांनी मराठा समाजावरती चुकीचे आरोप करत, तुणतुणे वाजवण्याचा प्रयत्न करू नये. अन्यथा आम्ही नारायण राणेंना त्यांची जागा दाखवू, असा इशाराही शिवरूपराजे खर्डेकर यांनी दिला.