जोहान्सबर्ग – दक्षिण आफ्रिकेत या महिन्यात संसदेच्या निवडणुका होणार आहेत. १९९४ पासून देशाच्या राजकारणावर ३० वर्षे वर्चस्व गाजवल्यानंतर सत्ताधारी आफ्रिकन नॅशनल काँग्रेससाठी या निवडणुका कठीण असणार आहेत. नवीन नॅशनल असेंब्ली तसेच प्रांतीय विधानसभेसाठी मतदान केले जाईल. देशाच्या अध्यक्षांची निवड नॅशनल असेंब्लीच्या सदस्यांद्वारे केली जाते.
दिनांक २९ मे रोजी होणाऱ्या मतदानामुळे त्यांची पुन्हा निवड होईल, अशी अध्यक्ष सिरिल रामाफोसा यांना आशा आहे. निवडणुकीत आफ्रिकन नॅशनल कॉंग्रेसला सर्वाधिक जागा मिळण्याची अपेक्षा आहे. मात्र या पक्षाला निवडणुकीत जर कमी मताधिक्य मिळाले, तर रामफोंसा यांना सरकार स्थापन करण्यासाठी अन्य पक्षांची मदत घ्यावी लागू शकते.
जॉन स्टीनहुइसन हे प्रमुख विरोधी पक्षांच्या डेमोक्रॅटिक आघाडीचे नेते आहेत. २०१९ च्या गेल्या सार्वत्रिक निवडणुकीत युतीने २२ टक्के तर आफ्रिकन नॅशनल कॉंग्रेसने ६२ टक्के जागा जिंकल्या होत्या.
ज्युलियस मालेमा यांनी २०१३ मध्ये स्थापन केलेला इकॉनॉमिक फ्रीडम फायटर्स हा पक्ष संसदेतील तिसरा सर्वात मोठा पक्ष आहे. तर माजी अध्यक्ष जेकब झुमा यांनी गेल्या वर्षी डिसेंबरमध्ये एमके पार्टी म्हणून ओळखल्या जाणाऱ्या म्खातो वेसिझ्वे पक्षाची स्थापना केली. निवडणुकीत हा पक्ष देखील महत्वाची भूमिका बजावू शकतो.
