श्रीगोंदा – तालुक्‍यातील शिरसगाव फाटा येथे झालेल्या दशरथ साहेबराब शिर्के यांच्या खूनप्रकरणी पोलिसांनी अमोल आप्पा कुरुमकर(वय 28) आणि अक्षय नानासाहेब वागसकर (वय 23, दोघे रा. वडाळी, ता. श्रीगोंदा) यांना अटक केली आहे. दरम्यान, एका महिलेशी असलेल्या अनैतिक संबंधांच्या कारणावरून काकाने केलेल्या शिवागाळीचा राग मनात धरून साडूच्या मुलानेच काकाचा खून केल्याचे समोर आले.
याबाबत सविस्तर माहिती अशी की, 4 मार्च रोजी तालुक्‍यातील शिरसगाव फाटा येथे दशरथ साहेबराव शिर्के (रा. शिरसगाव बोडखा) यांचा डोक्‍यात मारहाण करून खून करण्यात आला होता. जमिनीच्या वादातून हा खून झाला असल्याच्या संशयावरून मयताचा मुलगा श्रीरंग दशरथ शिर्के याने रामा राजु बरकडे आणि बिट्या राजु बरकडे (दोघे रा. बाबुर्डी, ता. श्रीगोंदा) यांच्याविरुद्ध फिर्याद दिली होती. परंतु, पोलिसांनी अधिक तपास केला असता फिर्यादीचा मावसभाऊ अमोल कुरुमकर याचे एका महिलेशी अनैतिक संबंध होते, त्यावरून मयत दशरथ शिर्के यांची आरोपी कुरुमकर याच्याशी शाब्दिक बाचाबाची झाली होती. याच गोष्टीचा राग मनात धरून अमोल कुरुमकर हा 4 मार्च रोजी रात्री दोन ते तीन वाजेच्या दरम्यान आपल्या साथीदारासह दुचाकीवरून शिरसगाव फाटा येथे गेला. मयत शिर्के हे तालुक्‍यातील शिरसगाव फाटा येथे त्यांच्या चहाच्या टपरीजवळ झोपलेले असताना त्यांच्या डोक्‍यात काठीने जबर मारहाण करून त्यांचा खून केला.
दरम्यान, शिर्के यांचा खून झालेल्या ठिकाणी कोणतीही चोरी झाली नव्हती.
शिवाय त्याठिकाणी असलेले विजेचे कनेक्‍शन तोडण्याऐवजी जिथे ‘जॉइंट’ आहे, तिथून आरोपींनी ते सोडून ठेवले होते. त्यावरून खून करणाऱ्या व्यक्तीला त्या परिसराची ईत्तमभूत माहिती असल्याचे अधोरेखित झाले होते. त्याचबरोबर संशयितांचे “मोबाईल लोकेशन’ तपासले असता पोलिसांना आरोपींबाबत खात्री झाली. आरोपींनी पोलिसांसमोर खुनाची कबुली दिली आहे.पोलीस निरीक्षक ज्ञानेश्वर भोसले, पोलीस उपनिरीक्षक समीर अभंग, सहायक फौजदार अंकुश ढवळे, विट्टल बडे, पोना गणेश गाडे, गोकुळ इंगवले, पोकॉ अमोल कोतकर, रविंद्र जाधव, प्रताप देवकाते, गणेश साने, प्रशांत राठोड यांनी या गुन्ह्याच्या तपासात महत्वपूर्ण कामगिरी केली.
