भारताच्या राष्ट्रीय कबड्डी संघाचा नियमित सदस्य असलेला रिशांक देवाडिगा हा आंतरराष्ट्रीय स्पर्धांमध्ये खेळणारा सर्वात घातक आणि उच्च कुशल चढाईपटू म्हणून ओळखला जातो. दुबई येथे 2018 मध्ये झालेल्या कबड्डी मास्टर्समध्ये सुवर्णपदक जिंकणार्‍या भारतीय संघाचा सदस्य होता. प्रो कबड्डी लीगमध्ये यापूर्वी यू मुंबा, आणि यूपी योद्धाचे प्रतिनिधीत्व केलेला रिशांक यंदाच्या हंगामात बंगाल वॉरियर्सकडून खेळताना दिसेल.
रिशांकचा जन्म मुंबईतील सांताक्रूझ येथे एका मध्यमवर्गीय कुटुंबात 3 फ्रेबुवारी 1992 रोजी झाला. लहानपणीच वडीलांचे छत्र हरपल्यामुळे त्याच्या कुटुंबावर मोठा आर्थिक ताण पडला होता. चेतना हजारीमल सोमाणी कॉलेज ऑफ कॉमर्स अँड इकॉनॉमिक्समधून रिशांकने वाणिज्य शाखेतून पदवी पूर्ण केली आहे.
रिशांकने वयाच्या 7 व्या वर्षी मित्रांसोबत कबड्डी खेळायला सुरुवात केली. त्याच्याकडील कौशल्ये आणि प्रचंड ताकदीमुळे त्याला त्याच्या शाळेत आणि गावी सर्वोत्तम चढाईपटू म्हणून ओळख मिळवून दिली. शालेय स्पर्धांमधील चढाईपटू म्हणून त्याच्या कामगिरीने त्याला प्रेरणा दिली आणि त्याने कबड्डीमध्ये कारकीर्द करण्याचा निर्णय घेतला. अखंड मेहनत आणि संघर्षानंतर त्याची मुंबई जिल्हा कबड्डी संघात निवड झाली.
रिशांकने पुढ बीपीसीएल आणि देना बँकेचे प्रतिनिधीत्वही केले. 2017 मध्ये, वरिष्ठ राष्ट्रीय कबड्डी चॅम्पियनशिपमध्ये सुवर्ण जिंकण्यार्‍या महाराष्ट्राच्या संघाचा रिशांक सदस्य होता. बीपीसीएल आणि देना बँकेसाठी त्याने केलेल्या सातत्यपूर्ण कामगिरीमुळे प्रो कबड्डी लीगच्या पहिल्या लिलावात त्याला यू मुंबाने 5 लाख रुपयांत करारबद्ध केले.
प्रो कबड्डी लीगच्या पहिल्या हंगामात रिशांक देवाडिगाने यू मुंबाकडून खेळताना 16 सामन्यांमध्ये 77 गुण कमावले. यामध्ये चढाई करताना तब्बल 64 गुण मिळवत आपल्या संघाला अंतिम फेरीत स्थान मिळवून दिले. मात्र, दुर्दैवाने यू मुंबाला अंतिम फेरीत जयपूर पिंक पँथर्सकडून पराभव स्वीकारावा लागला. मात्र, पहिल्या हंगामातील अपयश मागे सोडत यू मुंबाने दुसर्‍या हंगामात अंतिम सामन्यात बंगळुरु बुल्सचा पराभव करत विजेतेपद पटकावले. मुंबाच्या या विजयी मोहिमेत रिशांकने 13 सामन्यांमध्ये चढाई करताना 44 तर बचाव करताना 14 गुण मिळवले.
स्पर्धेच्या तिसर्‍या हंगामात रिशांकने 16 सामन्यांमध्ये यू मुंबाकडून सर्वाधिक 115 गुण मिळवत आपल्या संघाला सलग तिसर्‍या वेळी अंतिम फेरीत स्थान मिळवून दिले. अंतिम फेरीत यू मुंबावा पटना पायरेट्सकडून पराभव स्वीकारावा लागला. चौथ्या हंगामात, यू मुंबाची कामगिरी अंत्यत निराशाजनक झाली. यामध्ये रिशांकने 14 सामन्यांमध्ये 70 गुण मिळवले.
पहिल्या चार हंगामात यू मुंबाचा महत्वाचा सदस्य असलेल्या रिशांकचा 5 व्या हंगामात मुंबासोबचा प्रवास संपुष्टात आला. पाचव्या हंगामाच्या लिलावात त्याला यूपी योद्धाने 45.5 लाख रुपयांमध्ये करारबद्ध केले. या हंगामात रिशांकने त्याने त्याचा कारकिर्दीतील सर्वोच्च 170 गुण मिळवले. पुढे रिशांकने प्रो कबड्डीच्या सहाव्या आणि सातव्या हंगामात अनुक्रमे 104 आणि 75 गुण मिळवत आपली दमदार कामगिरी सुरु ठेवली.
रिशांक देवाडिगाची प्रो कबड्डी लीग कारकिर्द
एकूण सामने: 125
एकूण गुण: 669
चढाईतील गुण: 620
बचावातील गुण: 49
सुपर 10: 11 वेळा
एका सामन्यातील सर्वाधिक गुण: 28
