करोनाबाबतच्या संशोधनासाठी खटाटोप
बॅंकॉक – संपूर्ण जगात पसरलेल्या करोना विषाणूंचे मूळ शोधून काढण्यासाठी थायलंडमधील संशोधक चक्क ट्रेकिंग करत आहेत. करोनाचा प्रादुर्भाव वटवाघळांमधूनच झाल्याचे वारंवार बोलले जात असल्याने वटवाघळांचा अधिवास असलेल्या गुहेमध्ये जाऊन त्यांना पकडण्याचा प्रयत्न हे संशोधक करत आहेत.
संशोधनातून वटवाघळेच करोनाचे मोठे वाहक असल्याचे समोर आल्याचा दावा केला जात आहे. येथिल जॉन्स हॉपकिन्स विद्यापीठाच्या अहवालानूसार जगभरात जवळपास अडीच कोटी लोकांना करोनाची बाधा झाली आहे. जगभरात 7 लाख 48 हजार नागरिकांचा या व्हायरसमुळे मृत्यू झाला आहे. थायलंडमध्ये हॉर्सशू वटवाघळाच्या 19 प्रजाती आहेत. पण करोनाबाबत त्यांची चाचणी झालेली नाही, त्यामुळे हे संशोधक सध्या त्यांना पकडण्याच्या मोहिमेवर आहेत.
थायलंडच्या पश्चिम प्रांतातील कांचनबुरी येथील साई योक नॅशनल पार्कमध्ये तीन वेगवेगळया गुहांमधून येणारी वटवाघळे पकडण्यासाठी संशोधकांनी सापळे लावले आहेत. थाई रेड क्रॉस इन्फेकशियस डिजीस हेल्थ सायन्स सेंटरच्या टीमने वटवाघळांची लाळ, रक्त आणि स्टूलचे नमुने घेतले आहेत. हॉर्सशू या प्रजातींच्या वटवाघळांचेच नाही तर अन्य वटवाघळांच्या प्रजातीचे सुद्धा नमुने गोळा केले. ही वटवाघळे कुठल्या विषाणूंचा प्रसार करतात हे या संशोधनातून स्पष्ट होणार आहे.
यातील काही संशोधक वटवाघळे आणि त्यांच्याशी संबंधित आजारांचा 20 वर्षांपासून संशोधन करत आहेत. थायलंडमधील वटवाघळांमध्येच करोनावरील उपाय सापडेल असा संशोधकांना विशवास आहे.