पुणे – कसबा आणि चिंचवड विधानसभेच्या पोटनिवडणुकीसाठी भाजपने उमेदवार जाहीर केल्यानंतर राजकीय घडामोडींना मोठा वेग आला आहे. भाजपने कसब्यातून टिळक कुटुंबियांना उमेदवारी न देता हेमंत रासने यांच्या नावाची घोषणा केली. त्यानंतर कॉंग्रेसने देखील रवींद्र धंगेकर यांना उमेदवारी देत मैदानात उतरवले. तर, दुरीकडे भाजपाने पिंपरी चिंचवड येथील पोटनिवडणुकीसाठी दिवंगत आमदार लक्ष्मण जगताप यांच्या पत्नी अश्विनी लक्ष्मण जगताप यांना उमेदवारी दिली आहे.
कसबा आणि चिंचवड या दोन्ही ठिकाणी मुक्ता टिळक आणि लक्ष्मण जगताप यांच्या निधनानंतर पोटनिवडणूक होत आहे. या पोटनिवडणुकीत भाजप आणि महाविकास आघाडी यांच्यात मुख्य लढत होणार आहेत. मात्र मनसे मात्र पोटनिवडणूक लढवणार नसल्याचं स्पष्ट झालं आहे.
मिळालेल्या माहितीनुसार, कसबा मतदारसंघात मनसेची चांगली पकड आहे. त्यामुळे कसबा निवडणूक लढावी असा मनसेच्या स्थानिक पदाधिकाऱ्यांचा आग्रह होता. मात्र महाराष्ट्र नवनिर्माण सेनेचे अध्यक्ष राज ठाकरे यांनी निवडणूक बिनविरोध करण्यासाठी आग्रह धरल्याने मनसे या निवडणुकीत सहभाग घेणार नाही.
मात्र कार्यकर्त्यांचा असा विश्वास असे आहे की, कसबा मतदारसंघात आतापर्यंत मनसेला चांगले मतदान झाले आहे. त्यामुळे कसबा विधानसभा पोटनिवडणूक लढवली तर मनसे फायदा होईल. हिंदुत्वाच्या भूमिकेवरुन मनसे कसबा विधानसभा जिंकू शकते असा विश्वास कार्यकर्त्यांनी दाखवला होता.