पुणे- गेल्या वर्षी आणि यावर्षी एकाही मलेरिया बाधिताची नोंद महापालिकेकडे झाली नसून, 25 एप्रिल या “जागतिक मलेरिया दिना’निमित्त ही एकप्रकारे “पॉझिटिव्ह’ गोष्ट ठरली आहे. आधीच्या तुलनेत मलेरियासारखे कीटकजन्य आजार यांचे निश्चितच उच्चाटन होत असल्याचे यावरून दिसून येते.
दि. 25 एप्रिल या “जागतिक मलेरिया दिना’निमित्त लोकांमध्ये मलेरियाबाबत जागृती करण्याबरोबरच त्याचे निर्मुलन आणि त्याचा प्रतिबंध करण्याबाबत उपक्रम आयोजित केले जातात. यावर्षी मलेरियाची थीम ही “मलेरियाची आजाराचे ओझे कमी करण्यासाठी, लोकांचे जीव वाचवण्यासाठी नवीन संशोधनास जोडून घेऊ’ अशी आहे.
असा होतो रोगप्रसार
मलेरियाचा प्रसार काही विशिष्ट जातीच्या दूषित ऍनाफीलिस मादी चावल्यामुळे होतो. ग्रामीण भागात “ऍनॉफीलिस क्युलेसिफेसीस’ आणि शहरी भागात “ऍनाफीलिस स्टिफेन्सी’ हे अतिशय महत्वाचे रोगवाहक डास आहेत. बाधित मातेकडून नवजात अर्भकास जन्मजात मलेरिया होऊ शकतो. 14 ते 15 दिवसांत प्राथमिक लक्षणे दिसू लागतात.
लक्षणे
थकवा, डोकेदुखी, मळमळ, थंडी वाजणे आणि त्यानंतर हुडहुडी भरणे अशी लक्षणे दिसतात. ताप त्वरेने वाढत जातो, तीव्र स्वरुपाची डोकेदुखी आणि उलट्या होणे ही सर्वसाधारण लक्षणे दिसतात. त्याचबरोबर शरीराचे तापमान खूप वाढते. याचबरोबर भरपूर घाम येऊन ताप कमी होतो.
मलेरियाचे रुग्ण सातत्याने घटत आहेत. गेल्यावर्षी शहरात मलेरियाचे 2 हजार 359 संशयित रुग्ण आढळले होते. मात्र, त्यापैकी एकाही रुग्णाचे मलेरिया असल्याचे निदान झाले नाही. तर यावर्षी 345 संशयित रुग्ण आढळले असून, एकाचेही निदान झाले नाही. ही बाब दिलासादायक ठरत आहे.
– डॉ. संजीव वावरे, सहायक आरोग्यप्रमुख, मनपा