पुणे – करोनामुळे प्रतिकार शक्ती कमी होऊन पोस्ट कोविड मध्ये अन्य अनेक व्याधींचा सामना अनेकांना करावा लागत आहे. यात नागीण (हर्पिस लाबियालिस) रोगाची लागण झालेल्यांची संख्याही लक्षणीय असल्याचे दिसून येत आहे.
करोनातून बरे झाल्यावर रुग्णांना सांधेदुखीच्या समस्या, हृदयाच्या समस्या, रक्ताच्या गुठळ्या होणे आणि श्वसनाच्या समस्येचा त्रास होत आहे. दुसऱ्या आणि तिसऱ्या लाटेदरम्यान बाधित झालेल्यांना नागीण आणि सांधेदुखीच्या त्रासात लक्षणीय वाढ झाली आहे.
कोविड संसर्गातून मुक्त झाल्यानंतरही काळजी घेण्याचे आवाहन डॉक्टर्स करीत आहेत. ज्यांना सांधेदुखीचा पूर्व इतिहास आहे, त्यांना तर हा त्रास जास्त जाणवत आहे. याशिवाय काही जणांनी ऑटोइम्यून आथ्रायटिसची तक्रार देखील असल्याचे दिसून येते. हे रुग्ण सांधेदुखी किंवा स्नायू दुखी किंवा मायल्जिया, अत्यंत थकवा, संधिवात आणि रक्तवाहिन्यासंबंधीचा दाहची (रक्तवाहिन्यांची जळजळ) तक्रार करत असल्याचे डॉक्टरांचे निरीक्षण आहे.
समस्या सामान्यतः दिसून येतात. त्वचेवर पुरळ येणे, लालसरपणा येणे, डोळ्यांभोवती तसेच नाक, ओठ यासारख्या भागात त्वचारोग दिसून येणे यासारख्या तक्रारी वाढल्या आहेत. हे संक्रमण ज्येष्ठ नागरिक, गर्भवती महिलांमध्ये आढळून येते. ज्या रूग्णांना पूर्व इतिहास आहे, अशा रूग्णांमध्ये नागीण आणि त्वचेच्या इतर गुंतागुंत निर्माण होत आहेत. पुरळ उठणे, त्वचेचा लालसरपणा आणि ठिपके उठणे यासारख्या कोणत्याही लक्षणांकडे दुर्लक्ष करू नका, अशा वेळी तत्काळ वैद्यकीय मदत घेणे गरजेचे असल्याचे त्वचारोगतज्ज्ञ सांगतात. हर्पीज लाबियालिस (नागीण) हा रोग ओठाच्या ठिकाणी होऊ शकतो, त्यामुळे चट्टे पडून आग होते. हर्पीज झोस्टर यात नागिणीचा व्हॅरिसेला झोस्टर विषाणू पुन्हा डोके वर काढतो. त्यामुळेही चट्टे उमटतात शिवाय वेदनाही होतात. एचएसव्ही नागीण प्रकारापेक्षा हर्पीज झोस्टर हा नागिणीचा प्रकार करोनानंतर जास्त बघायला मिळाला आहे.
करोनानंतर तसेच प्रतिबंधक लस घेतल्यानंतरही रुग्णांना नागिन होत असल्याच्या तक्रारी आहेत. यामध्ये प्रतिकारशक्ती कमी झाल्याने रुग्णाच्या शरीरातील सुप्तावस्थेत असलेले नागिणीचे विषाणू पुन्हा सक्रिय होतात, त्यावर प्रतिबंधात्मक उपाय म्हणून नागिणीची लस घेणे हा पर्याय उपलब्ध आहे.
– डॉ. वसुधा बेळगावकर, सहयोगी प्राध्यापक, त्वचारोग विभाग, ससून रुग्णालय
करोनावर उपचार करण्यासाठी वापरल्या जाणाऱ्या स्टिरॉइड आणि अँटीव्हायरल औषधांचा परिणाम म्हणून ही संधीवात समस्या उद्भवली आहे. खुब्यातील हाड दुखण्याचे प्रमाण वाढले आहे. रक्त साकळल्याने हे दुखणे वाढल्याचे दिसून येत आहे. रक्तपुरवठा कमी झाल्याने खुब्याचे हाड दुखते.
– डॉ. निलेश जगताप, ऑर्थोपेडिक आणि जॉइंट रिप्लेसमेंट सर्जन