विश्रांतवाडी – प्रजासत्ताक दिनाचे औचित्य साधून सुरेंद्र पठारे फाउंडेशनच्यावतीने रक्तदान महाशिबीराचे आयोजन करण्यात आले आहे. आज (दि.२६) खराडी येथील पठारे इनडोअर स्टेडियम याठिकाणी हे शिबीर होईल. सुरेंद्र पठारे फाउंडेशनकडून मागील तीन वर्षांपासून सलग या उपक्रमाचे यशस्वीरित्या आयोजन केले जात आहे.
आज आपण आधुनिक प्रगत तंत्रज्ञानाच्या युगात आयुष्य जगत असलो तरीही रक्ताला कुठलाही पर्याय नाही. आपल्या देशात प्रती दोन सेकंदाला एखाद्या व्यक्तीला रक्ताची गरज भासत असते. बऱ्याचदा आवश्यक रक्तपुरवठ्याची पूर्तता होत नाही. करोना काळात तर रक्ताच्या अभावामुळे संपूर्ण आरोग्यव्यवस्था अक्षरश: हतबल झाली होती. रक्ताची गरज सार्वत्रिक असताना त्याची उपलब्धता मात्र मर्यादित प्रमाणात आहे.
आजही थोड्याबहुत फरकाने सार्वजनिक व खासगी आरोग्य सेवा पुरवणाऱ्या संस्थांना रक्तसाठ्याच्या टंचाई प्रश्न उभा आहे. हा प्रश्न मिटविण्यासाठी जास्तीतजास्त रक्त संकलित करण्याची गरज आहे आणि यामुळेच रक्तदानाच्या या महाचळवळीत सहभागी होऊन सुरेंद्र पठारे फाउंडेशन दरवर्षी रक्तदान शिबीर आयोजित करत आहे. येत्या रक्तदान महाशिबीरातही सर्वांनी मोठ्या संख्येने रक्तदान करून योगदान द्यावे, असे आवाहन सुरेंद्र पठारे फाउंडेशनचे अध्यक्ष सुरेंद्र बापूसाहेब पठारे यांनी केले आहे.
विक्रमी रक्तसंकलनाचा संकल्प
रक्तदान महाशिबीराच्या माध्यमातून अनुक्रमे २०२१ या वर्षी १६४४, २०२२ मध्ये ३४५३ तर मागील वर्षी ३५९३ रक्तपिशव्यांचे संकलन करण्यात आले. सुरेंद्र पठारे फाउंडेशनच्या या महाशिबिरास नागरिकांकडून मोठा प्रतिसाद लाभत आहे. या उपक्रमात सहभागी होणाऱ्यांची संख्या प्रतीवर्ष वाढत आहे. यंदाचे हे चौथे वर्ष असून याही वर्षी विक्रमी रक्तसंकलन करण्याचा संकल्प सुरेंद्र पठारे फाउंडेशनचे पदाधिकारी, कार्यकर्त्यांनी केला आहे.
