पिंपरी, दि. 24 – पिंपरी-चिंचवडमधील दळवणवळणाला चालणा देणारा पुणे महानगर क्षेत्र विकास प्राधिकरण (पीएमआरडीए) हद्दीतील 90, 65 आणि 30 मीटर रिंगरोड विकसित करण्याचा मार्ग मोकळा झाला आहे. “पीएमआरडीए’कडून रिंगरोडचे काम हाती घेण्यासाठी सर्व प्रक्रिया पूर्ण झाल्या आहेत. या रिंगरोडमुळे पुणे महापालिकेच्या हद्दीतून वाघोलीमार्गे आळंदी-मोशी-निगडी-पुनावळेमार्गे तळवडे आणि हिंजवडी आयटी पार्कमध्ये अगदी काही मिनीटातच पोहोचणे शक्य होणार आहे. त्यामुळे हिंजवडी आणि तळवडे आयटी पार्कमुळे शहरातील प्रमुख रस्त्यांवर होणारी वाहतूक कोंडी फोडण्यात यश येणार आहे.
पिंपरी-चिंचवड आणि पुण्याच्या विकासाला चालणा देण्यासाठी पुणे आणि पिंपरी-चिंचवड महापालिका व पीएमआरडीएच्या हद्दीत 65 मीटर रुंदीचा वर्तुळाकार बाह्यवळण मार्गाचे (रिंगरोड) काम प्रस्तावित आहे. सोलू ते वाघोली (वडगाव शिंदे) हा पुणे महापालिकेच्या हद्दीपर्यंतचा प्रादेशिक योजनेतील (रिजनल प्लॅन) 650 मीटर लांबीचा रिंगरोड पहिल्या टप्प्यात विकसीत करण्यात येणार आहे. यामध्ये पीएमआरडीच्या हद्दीतील 650 मीटर रस्त्याचा काही भाग 65 मीटर रुंदीचा तर प्रादेशिक योजना आराखड्यातील 90 मीटर रुंद रस्त्याचा समावेश आहे. हा रस्ता पिंपरी-चिंचवड महपालिका हद्दीतून पठारे मळा, चऱ्होली हद्द, स्पाईन रोड व तेथून पुढे निगडीतील जुन्या पुणे-मुंबई माहामार्गाला जोडणार आहे. यामुळे वाघोली ते लोहगाव, आळंदी, मोशी, निगडी, पुनावळे मार्गे हिंजवडी जाण्यासाठी उत्तम कनेक्टिव्हिटी साधली जाणार आहे. त्यामुळे हिंजवडी आणि तळवडे आयटी पार्कमुळे लगतच्या भागात होणारी वाहतूक कोंडी कमी करण्यास मदत होणार आहे.
पुणे आणि पिंपरी-चिंचवड महापालिकेच्या हद्दीतील रिंगरोड विकसित करण्याची जबाबदारी त्या-त्या महापालिकांची आहे. त्यानुसार मोशी पांजरपोळ चौक ते चऱ्होलीपर्यंत 9.50 कि.मी. लांबी व 30 मीटर रुंदीचा रस्ता पिंपरी-चिंचवड महापालिकेच्या स्थापत्य विभागाकडून विकसित करण्यात येत आहे. त्याचे 80 टक्के काम पूर्ण झाल्याचा दावा पीएमआरडीएने केला आहे. तर, पुणे महापालिकेच्या हद्दीतील सोलू ते वडगाव शिंदे हा 5.70 कि.मी. रिंगरोडचा भाग महापालिकेमार्फत विकसित करण्यात येत आहे. याच धर्तीवर 650 मीटर रस्त्याची लांबी 30 मीटर रुंदीने पीएमआरडीए विकसित करणार आहे. रिंगरोडचे काम पूर्ण झाल्यानंतर हा रस्ता पुणे-अहमदनगर महामार्गाला जोडला जाणार आहे. त्यामुळे पिंपरी-चिंचवडमधील वाहतूक कोंडी कमी करण्यासाठी फायदा होणार आहे.
कोंडी कायमची फुटणार
हिंजवडी आयटी पार्कमुळे वाकड, पिंपळे सौदागर, पिंपळे गुरव, पुनावळे, ताथवडे आणि रावेत भागात पीक अवर्समध्ये प्रचंड वाहतूक कोंडी होते. हिंजवडी आयटी पार्कमधून भूमकर चौक, चिंचवड, निगडी, मोशी किंवा भोसरीमार्गे दिघी व चऱ्होलीत जाण्यासाठी हा रिंगरोड फायद्याचा ठरणार आहे. त्यामुळे वाकड, पिंपळे सौदागर, कासारवाडीमार्गे भोसरीकडे जाणारी वाहतूक कमी होण्यासाठी मदत होणार आहे. तसेच, तळवडे आयटी पार्कमधून निगडी, भोसरी किंवा मोशी, चऱ्होलीमार्गे वाघोलीकडे जाण्यासाठी फायदेशीर पर्याय उपलब्ध होणार आहे. त्यामुळे मोशी चौकात, भोसरी व तळवडे भागात होणारी वाहतूक कोंडी कमी होणार आहे.