पिंपळे गुरव – पिंपरी चिंचवड महापालिकेच्या वतीने नवी सांगवी येथे पवनाथडी जत्रेचे आयोजन केले आहे. शनिवार, रविवारच्या सुटीमुळे शहरातील नागरिकांनी पवनाथडीमध्ये मोठ्या प्रमाणावर गर्दी केली आहे. शहरी आणि ग्रामीण संस्कृतीचे दर्शन पवनाथडीत पाहण्यास मिळत आहे. महाराष्ट्रीय पाककलेचा अनुभव घेण्यासाठी खव्वयांनी स्टॉलवर गर्दी केली आहे.
महिला बचत गटांनी उत्पादित केलेल्या वस्तूंना बाजारपेठ उपलब्ध व्हावी, महिलांमध्ये विपणन व विक्री कौशल्य विकसित व्हावे तसेच महिलांचे सबलीकरण करण्यासाठी महापालिकेच्या वतीने 11 जानेवारी ते 15 जानेवारी या कालावधीत सांगवी येथील पी. डब्ल्यू. डी. मैदानावर पवनाथडी जत्रा भरविण्यात आली आहे. या पाच दिवसीय जत्रेत शनिवारी आणि रविवारी आनंद घेण्यासाठी नागरिकांनी गर्दी केली होती.
उद्योगनगरीतील नागरिकांना शहरी आणि ग्रामीण संस्कृतीचा मिलाप पवनाथडीत अनुभवायला मिळत आहे. चविष्ट अशा महाराष्ट्रीयन पाककलेच्या समृद्ध वारशाचा आनंद घेण्यासाठी खव्वयांनी शाकाहारी आणि मांसाहारी खाद्यपदार्थांच्या स्टॉल्सच्या गर्दी केली. यंदाच्या जत्रेमध्ये प्रवेशद्वारापासूनच वैविध्यपूर्ण सजावट तसेच विद्युत रोषणाई करण्यात आली आहे. जी आकर्षित करणारी ठरली आहे. तर विविध सांस्कृतिक कार्यक्रमांच्या आयोजनाने संध्याकाळी उपस्थित रसिक मंत्रमुग्ध झालेले पाहायला मिळाले.
या गोष्टींचा अनुभव, खरेदी करता येणार…
महापालिकेच्या वतीने आयोजित पवनाथडी जत्रा लोकांच्या आकर्षणाचा विषय ठरत आहे. याठिकाणी केलेली नेत्रदिपक विद्युत रोषणाई, रचनात्मक स्टॉल्सच्या रांगा, पारंपरिक बैलगाडी व शेती साहित्य आकर्षणाचा केंद्रबिंदू ठरत असून सेल्फी काढण्यासाठी नागरिकांची गर्दी होत आहे. जत्रेमध्ये स्त्रियांसाठी कॉस्मेटिक्स, बॅग्स, साड्या, भांडी तर लहान मुलांसाठी खेळणी, पुस्तके, कार्टूनच्या बाहुल्यांची स्टॉल्स उपलब्ध आहेत. इतकेच नाही तर वेगवेगळी लोणची, पापड, कुरड्या, डाळी अशा घरगुती पदार्थांची खरेदी करण्यासाठी महिलांची गर्दी वाढताना दिसत आहे. पुरुषांसाठी चप्पल-बुट, खादीचे कपडे, कुर्ते, टोप्या, रुमाल, गॉगल्स, ब्रेसलेट्स, घड्याळ इत्यादींचे स्टॉल्स पाहायला मिळत आहेत. तर हुरड्यासह विविध शुद्ध शाकाहारी तसेच चमचमीत मांसाहारी खाद्यपदार्थ्यांच्या मेजवाणीवर खवय्ये ताव मारताना दिसत आहेत.
असे आहेत विविध कार्यक्रम
या जत्रेमध्ये लहान मुलांसोबत तरुण, ज्येष्ठ नागरिकही आकाशी पाळणा, ड्रॅगन ट्रेन, झिग सँग, रोलर अशा अनेक अंगावर शहारे आणणार्या खेळण्यांचा अनुभव घेताना दिसत आहेत. जत्रेच्या ठिकाणी सांस्कृतिक कार्यक्रमांचा आनंद घेण्यासाठी मोठ्या प्रमाणात लोकांची बैठक व्यवस्था असलेले सांस्कृतिक दालन उभारण्यात आले आहे. जेथे ऑर्केस्ट्रा, नाटक, लावणी, गोंधळ, सनई चौघडा, वाघ्या-मुरळींची जुगलबंदी अशा अनेक लोककलांचे तसेच सांस्कृतिक कार्यक्रमांचे आयोजन करण्यात येत असून विविध भागातील पारंपरिक कलाकारांना आमंत्रित करण्यात आले आहे. ‘खेळ रंगला पैठणीचा, होम मिनिस्टर’ हा कार्यक्रम सादर झाला. ज्यामध्ये अनेक महिलांनी सहभाग घेतला.
दिव्यांग, तृतीयपंथींचा समावेश
दिव्यांग, तृतीयपंथींच्या सामाजिक व आर्थिक समावेशनासाठी महापालिकेच्या वतीने प्रयत्न करण्यात येत असून त्यांच्यासाठीही स्टॉल्स राखीव ठेवण्यात आले आहेत. त्यांच्याद्वारेही येथे विविध वस्तू, खाद्यपदार्थांची विक्री करण्यात येत आहे. यासोबतच 18 ते 30 वयोगटातील युवकांकडून विविध वस्तू, खाद्यपदार्थांची विक्री करण्यात येत आहे.
पवनाथडी जत्रेच्या ठिकाणी कोणतीही गैरसोय होऊ नये यासाठी महापालिकेचे कर्मचारी, कायदा व सुवव्यवस्थेसाठी सुरक्षा कर्मचारी, महाराष्ट्र सुरक्षा दलाचे कर्मचारी आणि पोलीस दलाच्या जवानांसह आपत्कालीन परिस्थिती उद्भवल्यास अग्निशमन बंब, सुसज्ज रुग्णवाहिका तैनात करण्यात आली आहे.
– अजय चारठाणकर, उपआयुक्त, समाज विकास विभाग.