बीजिंग – चीनमध्ये सिनोफार्म या औषध कंपनीने बनवलेल्या कोविड-19 विरोधी लसीच्या वापराला सशर्त परवानगी देण्यात आली आहे. या संदर्भातील अधिकृत घोषणा आज करण्यात आली. या लसीची परिणामकारकता 79.34 टक्के आणि ऍन्टीबॉडी-पॉझिटिव्ह रुपांतरणाचा दर 99.52 टक्के असल्याचे तिसऱ्या टप्प्यातील वैद्यकीय चाचणीचा हंगामी निष्कर्शात दिसून आल्याचे सिनोफार्म कंपनीच्यावतीने जाहीर करण्यात आले. त्याच्या दुसऱ्याच दिवशी या लसीच्या वापराला परवानगी देण्यात आली.
बीजिंग बायोलॉजिकल प्रॉडक्टस इस्टिट्युटने सिनोफार्मची उपकंपनी असलेल्या चायना नॅशनल बायोटेक ग्रुपच्या सहकार्याने ही लस विकसित केली आहे. चीनच्या राष्ट्रीय वैद्यकीय उत्पादा प्राधिकरणाकडून या लसीला अधिकृत मान्यता देण्यात आली आहे, असे राष्ट्रीय वैद्यकीय उत्पादनांचे उप प्रमुख चेन शिफेई, यांनी सांगितले.
चीनमध्ये आपत्कालीन वापरासाठी सिनोफार्मची निष्क्रिय लस सुमारे दहा दशलक्ष लोकांना दिली गेली आहे आणि त्यापैकी कोणावरही विपरीत परिणाम आढळलेले नाहीत. सुमारे 10 पेक्षा जास्त देशांमधील 70,000 स्वयंसेवकांनी तिसऱ्या टप्प्याच्या वैद्यकीय चाचण्यांमध्ये भाग घेतला आहे,
या लसीचे निष्कर्श जागतिक आरोग्य संघटना आणि चीनी प्रशासनाने निश्चित केलेल्या मानकांच्या 50 टक्के अधिक सरस आहेत. तसेच या लसीची सुरक्षिततेची पातळीही चांगली असल्याचे या संदर्भातील वृत्तात म्हटले आहे.
एकूण 11 चिनी उमेदवारांवर लसीच्या वेगवेगळ्या टप्प्यातील चाचण्या सुरू आहेत. त्यापैकी काही देशात आणि काही परदेशात आहेत. या लसीच्या प्रारंभीच्या निष्कर्शानुसार सिनोफार्म लस सुरक्षित असल्याचे आढळले आहे. ज्या व्यक्तींना या लसीचे दोन डोस दिले गेले आहेत, त्यांच्यात मोठ्या प्रमाणात ऍन्टीबॉडीज निर्माण झाल्याचे आढळून आले आहे, असे सिनोफार्मची उपकंपनी असलेल्या बीजिंग बायोलॉजिकल प्रॉडक्टस इन्स्टिट्युट कंपनीने म्हटले आहे.
अमेरिकेत फायझर आणि मॉडर्नाच्या लसीच्या वापराला परवानगी दिली गेली आहे. रशियामध्येही स्पुटनिक-व्ही या लसीला परवानगी दिली आहे. तर ब्रिटनमध्ये ऑक्सफर्ड-ऍस्ट्राझेनेका लसीला परवानगी दिली आहे आणि पहिला डोस सोमवारीच दिला गेला.