मुंबई – निधी वाटपावरून खासदार गजानन कीर्तीकर यांचे काही गैरसमज झाले असतील तर दूर करू. भाजप व शिवसेनेत जागावाटपावरून कोणताही वाद नाहीत. भाजप व शिवसेनेची युती घट्ट आहे, असे वक्तव्य शालेय शिक्षणमंत्री दीपक केसरकर यांनी केले आहे.
शिवसेना सोडून शिंदे गटासोबत गेलेले खासदार गजानन कीर्तिकर यांनी भाजपकडून सापत्न वागणूक मिळत असल्याचा जाहीर आरोप केला होता. त्यामुळे युतीतील मतभेद चव्हाट्यावर आले आहेत. यावर आज पत्रकारांशी बोलताना दीपक केसरकर यांनी स्पष्टीकरण दिले. केसरकर म्हणाले, कीर्तिकर यांचे काही काम होत नसेल किंवा गैरसमज असतील तर आम्ही चर्चेतून दूर करू. लोकसभेसाठी युतीत 2019 चाच फॉर्म्युला राहील. अंतिम निर्णय दोन्ही नेतेच घेतील. युती मजबूत आहे. कोकणातून लोकसभा निवडणूक लढवण्याच्या चर्चेचे खंडन करताना ते म्हणाले, मी राज्यातच खुश आहे.
भाजपबद्दल उघड नाराजी व्यक्त करताना कीर्तिकर यांनी, शिंदेंसोबत आम्ही 13 खासदार आलो, “एनडीए’त सहभागीही झालो. पण घटक पक्षाचा दर्जा मिळाला नाही. भाजपकडून सापत्न वागणूक दिली जाते. 2019 मध्ये शिवसेनेने 22 जागा लढवल्या होत्या. यापुढेही त्या आम्हीच लढवणार, असे म्हटले होते.
दरम्यान, राहुल नार्वेकरांनी शिंदे गट व ठाकरे गटाकडे आपापल्या पक्षाच्या घटना मागितल्याची माहिती आहे. यावर भाष्य करताना केसरकर म्हणाले, उद्धव ठाकरे यांनी शिवसेनेच्या घटनेत बदल करून स्वत:ला पक्षाध्यक्ष बनवून घेतले. उद्धव ठाकरे यांनी केलेले हे बदल बेकायदेशीर असल्याचे केंद्रीय निवडणूक आयोगाने म्हटले आहे. आता विधानसभा अध्यक्ष पुन्हा शिवसेनेच्या घटनेचा अभ्यास करून योग्य निर्णय घेतील, अशी अपेक्षा केसरकर यांनी व्यक्त केली.
राऊतांवर हक्कभंग का नाही?
केसरकर बोलताना पुढे म्हणाले, आमदारांच्या अपात्रतेसह इतर मुद्‌द्‌यांवर निर्णय घेण्याचा अधिकार विधानसभा अध्यक्षांना आहे. विधानसभेतील ते सर्वोच्च नेते आहेत. तरीही संजय राऊत त्यांना अक्षरश: धमक्‍या देतात. त्यामुळे संजय राऊतांवर तातडीने हक्कभंगाची कारवाई झाली पाहीजे. त्यांच्यावर अद्याप हक्कभंग का झाला नाही? हा एक प्रश्नच आहे.
