मुंबई : ठाण्यातील विवीयाना मॉलमधील सिनेमागृहात छत्रपती शिवाजी महाराजांच्या जीवनावर आधारित ‘हर हर महादेव’ चित्रपटांमध्ये इतिहासाची मोडतोड करण्यात येत असल्याचा आरोप करत राष्ट्रवादीने प्रेक्षकांना सिनेमागृहात बाहेर जाण्याचे आवाहन केले. त्यानंतरही सिनेमागृहात बसून असलेल्या प्रेक्षकांना राष्ट्रवादीच्या कार्यकर्त्यांनी हुसकावून लावल्याने किरकोळ वादाचे प्रसंगही घडले. त्यात एका प्रेक्षकाला मारहाणही झाली. सोमवारी रात्री १० वाजता सुरू झालेल्या ‘हर हर महादेव’ चित्रपटाचा शो राष्ट्रवादीने बंद पाडला. त्यानंतर आता या प्रकरणावरुन राष्ट्रवादी आणि महाराष्ट्र नवनिर्माण सेना आमने-सामने आल्याचे चित्र दिसत आहे.
शो बंद पडताय मग आमचे पैसे परत द्या अशी मागणी करणाऱ्या मराठी रसिकांना राष्ट्रवादी च्या गुंडांनी केलेली मारहाण !!@CMOMaharashtra @mieknathshinde @mnsadhikrut @RajThackeray pic.twitter.com/l1yvh5toIj
— Ameya Khopkar (@MNSAmeyaKhopkar) November 7, 2022
राष्ट्रवादीचे नेते जितेंद्र आव्हाड यांच्या नेतृत्वाखाली विवीयाना मॉलमध्ये आंदोलन करण्यात आले. यामुळे सिनेमागृहात काहीकाळ गोंधळाची परिस्थिती निर्माण झाली होती. या गोंधळानंतर अमेय खोपकर यांनी, “अफझल खानचे स्वयंघोषित प्रवक्ते आणि मुंब्रा प्रांताचे नवाब यांचे इतिहासाचे ज्ञान…” असे म्हणत आव्हाड यांना खोचक टोला लगावला आहे. “हे महाराजांचा इतिहास खरा काय आणि खोटा काय ते सांगत आहेत,” असे म्हणत अमेय खोपकर यांनी घडलेल्या प्रकारावरुन नाराजी व्यक्त करत टोला लगावला आहे.
“अफझल खान हा जर आपल्या सीमेचं रक्षण करण्यासाठी आला होता तर त्याने तुळजापूर येथील मंदिरावर हल्ला का केला?” असा प्रश्नही खोपकर यांनी ट्वीटरवरुन विचारला आहे.
“शो बंद पडताय मग आमचे पैसे परत द्या अशी मागणी करणाऱ्या मराठी रसिकांना राष्ट्रवादीच्या गुंडांनी केलेली मारहाण,” असे म्हणत खोपकर यांनी काल ठाण्यात घडलेल्या मारहाण नाट्याचा व्हिडीओही शेअर केला आहे.
संभाजीराजे छत्रपती यांच्या पत्रकार परिषदेनंतर राष्ट्रवादीचे नेते जितेंद्र आव्हाड यांनी ट्वीटद्वारे मोठे विधान केले होते. महाराष्ट्रात छत्रपती शिवाजी महाराजांचा खोटा आणि चुकीचा इतिहास मांडण्याची परंपरा शिवशाहीर बाबासाहेब पुरंदरे यांनी सुरू केला, असा आरोप जितेंद्र आव्हाडांनी केला होता. त्यापाठोपाठ त्यांनी सोमवारी रात्री ‘हर हर महादेव’ चित्रपटाविरोधात आंदोलन केले. आव्हाड यांनी कार्यकर्त्यांसह विवीयाना मॉलमधील सिनेमागृहात शिरून ‘हर हर महादेव’ चित्रपटाचा शो बंद पाडला.