मुंबई : मुंबईत बोरिवली पश्चिमच्या एका शॉपिंग सेंटरला आज सकाळी आग लागल्याची माहिती समोर येत आहे. आग विझवण्यासाठी अग्निशमनच्या १४ गाड्या आणि पोलीस घटनास्थळी पोहोचले असून युद्धपातळीवर आग विझवण्याचे काम सुरु असल्याचे सांगण्यात येत आहे. या आगीत किती नुकसान झाले याची माहिती अद्याप कळू शकलेली नाही.ही भीषण आग लेव्हल ४ची असल्याचे एएनआयच्या ट्विटमध्ये म्हटले आहे.
Maharashtra: Fire breaks out at a shopping centre at Borivali West in Mumbai; 14 fire engines at the spot. More details awaited.
— ANI (@ANI) July 11, 2020
सकाळी आगीच्या घटनेची वर्दी मिळताच अग्निशमन दलाच्या १४ गाड्या घटनास्थळी रवाना झाल्या. त्याचबरोबर पोलीसांनीही घटनास्थळी धाव घेतली. शॉपिंग सेंटर आगीच्या भक्षस्थानी पडल्याने बराच मोठा माल यात भस्मसात झाल्याची शक्यता नाकारता येत नाही. कारण, मोठ्या प्रमाणावर काळा धूर या परिसरात पसरला होता. अग्निशमन दलाकडून आग विझवण्याचे शर्थीचे प्रयत्न सुरु आहेत. या आगीत काय आणि किती नुकसान झाले याचा तपशिल अद्याप मिळू शकलेला नाही.
दरम्यान, अशाच प्रकारे सुमारे पंधरा दिवसांपूर्वी मानखुर्द घाटकोपर लिंक रोड दरम्यान असलेल्या स्क्रॅप कंपाऊंडला सकाळी ६ च्या सुमारास आग लागली होती. ही आग लेव्हल ३ ची असल्याची माहिती अग्नीशमन दलाकडून देण्यात आली होती. या ठिकाणी स्क्रॅप करण्यात आलेल्या वस्तू आणि तेलाच्या डब्यांनाही आग लागली होती.