मुंबई – महाराष्ट्रातील कफ सिरपच्या सहा उत्पादकांचे परवाने नियमांचे उल्लंघन केल्याप्रकरणी निलंबित करण्यात आले आहेत. राज्य सरकारने विधानसभेत ही माहिती दिली. भारतीय जनता पक्षाचे आमदार आशिष शेलार आणि इतरांनी केलेल्या लक्षवेधी सूचनेला उत्तर देताना अन्न व औषध प्रशासन मंत्री संजय राठोड यांनी शुक्रवारी विधानसभेत ही माहिती दिली.
उत्तर प्रदेशातील नोएडा येथील एका फर्मने बनवलेल्या कफ सिरपमुळे गेल्या वर्षी उझबेकिस्तानमध्ये 18 मुलांचा मृत्यू झाल्याचा आरोप आहे. नोएडा पोलिसांनी शुक्रवारी सांगितले की त्यांनी फर्मच्या तीन कर्मचाऱ्यांना अटक केली आहे.
राठोड म्हणाले की, महाराष्ट्र सरकारने राज्यातील कफ सिरपच्या 108 पैकी 84 उत्पादकांची चौकशी सुरू केली आहे. त्यापैकी चार कंपन्यांचे उत्पादन बंद करण्याचे निर्देश देण्यात आले तर सहा कंपन्यांचे परवाने निलंबित करण्यात आल्याचे त्यांनी सांगितले. 17 कंपन्यांना नियमांचे उल्लंघन केल्याबद्दल कारणे दाखवा नोटीस बजावण्यात आल्याचे मंत्री म्हणाले.
शेलार यांनी भारतातून आयात केलेल्या कफ सिरपमुळे कथितरित्या गांबियातील 66 मुलांचा मृत्यू झाल्याचा उल्लेख केला. परंतु मंत्री म्हणाले की त्या प्रकरणात नियमांचे उल्लंघन केल्याचा आरोप असलेली कंपनी हरियाणातील आहे आणि तिचे महाराष्ट्रात कोणतेही उत्पादन युनिट नाही. आम्ही मात्र, नियमांचे उल्लंघन करणाऱ्यांवर कठोर कारवाई केली आहे. उत्पादनांची राज्यातून निर्यात करताना जागतिक आरोग्य संघटनेचे निकष, संबंधित नियम आणि फार्मास्युटिकल उत्पादनांचे प्रमाणपत्र यांचे पालन केले जाईल याची आम्ही खात्री करत आहोत.
HSC Exam : राज्य शिक्षण मंडळाचे स्पष्टीकरण; “इयत्ता 12 वी च्या गणित विषयाची परीक्षा…”
पीठासीन अधिकारी संजय शिरसाट म्हणाले की, 20 टक्के उत्पादकांना नियमांचे उल्लंघन केल्याचा संशय आल्याने छापे टाकले जात असतील तर ते लोकांच्या जीवाशी खेळण्यासारखे आहे म्हणून त्याची गांभीर्याने दखल घेणे आवश्यक आहे. राज्यातील 996 ऍलोपॅथी औषध उत्पादकांपैकी 514 कंपन्या त्यांची उत्पादने निर्यात करतात.