मुंबई – अभिनेत्री रिया चक्रवर्ती हिने दिलेल्या तक्रारीनुसार दिवंगत अभिनेता सुशांतसिंह राजपूत यांच्या दोन बहिणींच्या विरोधात गुन्हा दाखल करणे हे आमचे कर्तव्यच आहे, त्यानुसार त्यांच्या विरोधात गुन्हा दाखल केला आहे, अशी माहिती मुंबई पोलिसांच्या वतीने आज हायकोर्टात दिली.
सुशांत याच्या बहिणी प्रियांका सिंह आणि मितू सिंह यांनी जी याचिका हायकोर्टात केली आहे ती रद्द करावी, अशी मागणीही मुंबई पोलिसांनी हायकोर्टात केली आहे. खोटी माहिती दिली आणि भावासाठी खोटी मेडिकल प्रिस्क्रीप्शन दिली या कारणावरून सुशांतच्या या दोन बहिणींच्या विरोधात गुन्हा दाखल करण्यात आला आहे. तो रद्द करावा, अशी मागणी करणारी याचिका या दोघी बहिणींनी केली होती. त्याला मुंबई पोलिसांनी विरोध केला आहे.
रिया चक्रवर्ती हिने दिलेल्या तक्रारीवरून सप्टेंबर महिन्यात बांद्रा पोलिसांत या दोघा बहिणींच्या विरोधात हा गुन्हा नोंदवण्यात आला आहे. आम्ही हा गुन्हा दाखल केल्याने सुशांत किंवा त्यांच्या बहिणीचे कोणतेही प्रतिमा हनन होत नाही तसेच या संबंधात जो सीबीआय तपास सुरू आहे त्याच्यावरही काही परिणाम होणार नाही, असे पोलिसांनी सांगितले. सुशांतच्या बहिणींनी दिल्लीच्या वैद्यकीय व्यावसायिकाकडून खोटे प्रिस्क्रीप्शन लिहून घेतले होते व त्यानुसार सशांतला औषधे पुरवली जात होती अशी माहिती रियाने तक्रारीत केली होती.
कोणतीही तपासणी न करता सुशांतला चुकीची औषधे दिली जात असल्याचे यात नमूद केले होते. त्यातून सुशांतसिंह याच्या प्रकृतीत जी गुंतागुंत झाली त्यातूनच त्याने आत्महत्या केली असावी, असेही पोलिसांच्या वतीने हायकोर्टात दिलेल्या निवेदनात नमूद करण्यात आले. या विषयी रियाने पोलिसांना माहिती दिली आहे. त्यामुळे त्यानुसार गुन्हा दाखल करणे हे पोलिसांचे कर्तव्यच ठरते असेही पोलिसांच्या वतीने नमूद करण्यात आले आहे.