नवी दिल्ली – भारतामध्ये घरबांधणी क्षेत्र वेगाने विकास होत आहे. त्याचबरोबर घर घेणाऱ्यांची संख्या आगामी काळात मोठ्या प्रमाणात वाढणार आहे. त्यामुळे पुढील पाच वर्षात घरासाठी कर्जाची रक्कम वाढून 600 अब्ज डॉलरपर्यंत जाण्याची शक्‍यता आहे, असे जेष्ठ बॅंकर दीपक पारेख यांनी म्हटले आहे.
एचडीएफसीचे अध्यक्ष असलेले पारेख यांनी आपल्या कंपनीच्या भागधारकांना पाठविलेल्या पत्रात म्हटले आहे की, एचडीएफसीची स्थापना 17 ऑक्‍टोबर 1977 रोजी झाल्यापासून ही कंपनी वेगाने वाढले आहे. एचडीएफसीने भारतातील लाखो लोकांची घर घेण्याची इच्छा पूर्ण करण्याचा प्रयत्न केला आहे. 1999 पासून पारेख एचडीएफसीचे अध्यक्ष आहेत. ते म्हणाले की, भारताची अर्थव्यवस्था वेगाने सुधारत आहे. त्यामुळे घरबांधणी क्षेत्राबाबत मी कायम आशावादी आहे. करोनाच्या काळातही हे क्षेत्र वेगाने वाढेल असे आपण म्हटले होते.
करोनाच्या काळातही घरांची मागणी कमी झाली नाही. आता घरांची निर्मिती आणि मागणी आगामी काळात मोठ्या प्रमाणात वाढणार आहे. भारत सध्या एका आर्थिक स्थित्यंतरातून जात आहे. भारतातील लोकांचे उत्पन्न वाढणार आहे. यामुळे आगामी काळात घर घेणाऱ्यांची संख्या वेगाने वाढणार आहे.
सध्या घरासाठी घेतले जाणारे कर्ज साधारणपणे 300 अब्ज डॉलर आहे. एक अब्ज डॉलर म्हणजे 7 हजार कोटी रुपये होतात. घरासाठी कर्जाचे प्रमाण राष्ट्रीय उत्पन्नाच्या केवळ 11 टक्के आहे. विकसीत देशात आणि इतर आशियाई देशांमध्ये हेच प्रमाण 20 ते 30 टक्के आहे.
त्यामुळे भारतामध्ये घरासाठीच्या कर्ज पुरवठ्यासाठी व अमर्यादित वाव असल्याचे त्यांनी सांगितले. गेल्या चाळीस वर्षांमध्ये एचडीएफसी 93 घरासाठी कर्जपुरवठा केला आहे. आता एचडीएफसी आणि एचडीएफसी बॅंकेचे विलीनीकरण होणार आहे. त्यामुळे नव्या बॅंकेची कर्जपुरवठा करण्याची क्षमता त्या प्रमाणात वाढणार आहे. यासाठी आवश्‍यक परवानग्या वेगात मिळतील अशी आशा त्यांनी व्यक्त केली.
