अर्धकटी चक्रासन हे दंडस्थितीमधील आसन आहे.
– प्रथम ताठ सरळ उभे राहावे.
– दोन्ही हाताचे तळवे मांडीला चिकटवावेत.
– श्वास घेत डावा हात बाजूने वरच्या दिशेला घ्यावा.
– दंड कानाला टेकलेला असावा.
– त्यानंतर हळूहळू कंबरेतून उजव्या बाजूला वाकावे.
– आसनस्थिती पूर्ण झाल्यावर श्वसन संथ सुरू ठेवावे.
हे आसन करत असताना कंबरेवर ताण येतो तसेच कंबरेपासून बगलेपर्यंत ताण येतो. पण तो ताण सुखकर वाटेल इथपर्यंतच आसन टिकवावे. आसन करताना नजर समोर स्थिर ठेवावी. पायात खांद्याएवढे अंतर घेऊनही उभे राहू शकतो किंवा पाय जुळवूनही आसनस्थिती करता येते. त्यावेळी ताण जास्त येतो. आसनस्थितीमध्ये जेवढा वेळ स्थिर राहाणे शक्य आहे, तेवढा वेळ आसनात थांबावे. आसन सोडताना सावकाश हात जागेवर घ्यावा.
मान सरळ करावी. हे आसन एकदा डाव्या हाताने व एकदा उजव्या हाताने अनुक्रमे करता येते. या आसनामुळे हातापासून पायापर्यंतची बाजू ताणली जाते. संपूर्ण शरीराचा रक्तप्रवाह सुधारतो. त्यामुळे आसन नियमित करावे. कंबरदुखी थांबते तसेच कंबरेचे स्नायू मजबूत होतात. काही वेळा कंबरेच्या स्नायूमध्ये गॅप पडलेली असते. ती भरून निघायला या आसनाने मदत होते. हे आसन 30 सेकंदापर्यंत आपण टिकवू शकतो.
एकंदर हातापायाच्या स्नायूंची कार्यक्षमता वाढते. ज्यांना वाताचा त्रास असेल तसेच पोटदुखीचा विकार असेल किंवा पचनाचा प्रॉब्लेम असेल त्यांनी अर्धकटी चक्रासन नियमित करावे. एकंदर तुमच्या अतिरिक्त चरबीचा ऱ्हास होतो.
शरीराची चपळता वाढते तसेच शेलाट्या बांध्यासाठी अर्धकटीचक्रासन रोज करावे. खांदे, पाठीच्या कण्याची ताकद वाढते. आपल्या मज्जारज्जूला व्यायाम मिळतो. त्यामुळे सुषुम्नानाडीतून कुंडलिनी शक्ती चांगल्याप्रकारे वाहू लागते. पण यासाठी हे आसन नियमित केले पाहिजेत. त्याचप्रमाणे ध्यानाची बैठकही हवी. एकंदर रोजच्या जीवनात आपली कार्यक्षमता वाढते म्हणून अर्धकटीचक्रासन करावे.