मुंबई : एक काळ होता जेव्हा प्रेमी युगुल आपले प्रेमसंदेश पोहचवण्यासाठी चिठ्ठीचा हमखास वापर करायचे. 90 च्या दशकात कित्येकांचे प्रेम या चिठ्ठ्यांमुळेच फुलले असावे. सध्या मात्र काळानुसार प्रेम व्यक्त करण्याचे माध्यम आणि पद्धतसुद्धा बदलेली आहे. अनेकजण आपलं प्रेम तसेच आपला प्रेमभंग व्यक्त करण्यासाठी वेगवेगळ्या युक्त्या लढवतायत. सध्या 20 रुपयांच्या नोटेवरचा आपल्या प्रियकरासाठीचा संदेश पाठवणारी पुष्पा चर्चेचा विषय ठरली आहे.
मागे काही दिवसांपूर्वी “सोनम गुप्ता बेवफा है…’ असा मजकूर असलेली दहा रुपयांची नोट चांगलीच व्हायरल झाली होती. चक्क नोटेवर लिहलेला एका प्रेमवेड्याचा हा संदेश काही क्षणात लाखो लोकांपर्यंत पोहोचला होता. त्याचा झालेला प्रेमभंग पाहून अनेकांनी दु:खसुद्धा व्यक्त केलं होतं. या प्रेमवेड्याला त्याची सोनम पुन्हा मिळावी अशी इच्छासुद्धा अनेकांनी व्यक्त केली होती. तर काहींनी ‘सोनम गुप्ता बेवफा है…’ या मेसेजला पाहून मिष्कील भाष्यसुद्धा केलं होतं.
आता असाच एक प्रेमसंदेश चांगलाच व्हायरल होत आहे. यावेळी आता बेवफाई नाही तर चक्क प्रेम निभावण्याचे आवाहन करणारी एक 20 रुपयांची नोट सोशल मीडियावर व्हायरल होत आहे. या वीस रुपयांच्या नोटेवर लिहलेला मजकूर स्पष्टपणे दिसतो आहे. पुष्पा नावाच्या मुलीने आपला प्रियकर दीपू याच्यासाठी हा मजकूर लिहला आहे.
20 रुपयांच्या नोटेवर पुष्पाने तिचं लग्न 26 एप्रिलला असल्याचं सांगितलं आहे. तसेच, ती दीपूला दीपूजी म्हणत मला लवकरात लवकर येथून घेऊन जा असं सांगतेय. प्रिय दीपूजी! मेरी शादी 26 अप्रैल को हैं, मुझे अपने साथ भगा ले चलो। तुम्हारी पुष्पा. I Love You’, असं पुष्पाने एका नोटीवर आपला प्रियकर दीपूजीसाठी संदेश लिहला आहे.
दरम्यान, पुष्पाने लिहलेला हा संदेश खरा आहे की खोटा याबद्दल अजूनतरी निश्चित काही समजू शकले नाही. मात्र, हा संदेश खरा असल्याचे ग्राह्य धरत अनेकांनी या नोटीवरच्या संदेशाला आपल्या सोशल मीडिया अकाऊंटवर शेअर केलं आहे. सोनम गुप्ताच्या बेवफाईनंतर आता पुष्पाचे प्रेम नेटकऱ्यांसाठी चर्चेचा विषय ठरला आहे.