पुणे -शालेय शिक्षण विभागात एकापाठोपाठ एक घोटाळे उघडकीस येतच आहेत. लाखो रुपयांचे घोटाळे करणारे घोटाळेबाज अधिकारी पोलिसांच्या सापळ्यात अडकू लागले आहेत. प्रामुख्याने शिक्षण विभागातील घोटाळ्यांचे कनेक्शन महाराष्ट्र राज्य परीक्षा परिषदेतच पोहोचत असल्याची गंभीर बाब उघडकीस येत आहे.
राज्यात सन 2012 नंतर शिक्षक भरतीला बंदी असताना मोठ्या आर्थिक उलाढाली करुन नियम डावलून बोगसपणे शिक्षक भरती करण्यात आली. या प्रकरणात 28 अधिकारी, शिक्षक, कर्मचारी यांचा सहभाग आहे. या प्रकरणाचा तपास आर्थिक गुन्हे शाखेकडे सोपविण्यात आलेला आहे. हे प्रकरण ताजे असतानाच परीक्षा परिषदेच्या वतीने सन 2018 व 2020 मध्ये घेण्यात आलेल्या “टीईटी’ घोटाळा उघडकीस आला. “टीईटी’ परीक्षेच्या निकालात फेरफार करुन साडेनऊ हजार उमेदवारांना पात्र करण्यात आले. यात काही उमेदवारांची “टीईटी’ची प्रमाणपत्रेही बोगस आढळून आली. यात परीक्षा परिषदेचे तत्कालीन आयुक्त तुकाराम सुपे, सुखदेव डेरे यांच्यासह परीक्षा घेणाऱ्या कंपनीचे संचालक, कर्मचारी यांचा हात असल्याचे आढळून आले होते. राज्य मंडळ व पुणे बोर्डातील काही कनिष्ठ लिपिकांची टायपिंगची प्रमाणपत्रेही बोगस आढळून आल्याचे प्रकरण काही महिन्यांपूर्वीच घडले होते.
दोनच दिवसापूर्वी शिक्षण विभागातील वरिष्ठ लेखाधिकारी प्रमिला गिरी, कनिष्ठ लेखाधिकारी अनिल लोंढे यांना पाच हजार रुपयांची लाच घेतल्याप्रकरणी “एसीबी’च्या पथकाने पडकले होते. शिक्षक पदावर नोकरीला लावण्याच्या आमिषाने फसवणूक केल्याबद्दल परीक्षा परिषदेच्या प्रभारी आयुक्त शैलजा दराडे व त्यांचा भाऊ दादासाहेब दराडे यांच्यावर नुकताच गुन्हा दाखल करण्यात आला आहे. यामुळे परीक्षा परिषद पुन्हा एकदा चर्चेत आहे. “टीईटी’ घोटाळ्यातही काही उमेदवारांकडून दादासाहेब दराडे यांचे नाव घेण्यात आले होते. शैलजा दराडे यांची परीक्षा परिषदेत डिसेंबर 2020 मध्ये पदोन्नतीने उपायुक्तपदी नियुक्ती करण्यात आली होती. त्यापूर्वी त्या प्राथमिक शिक्षण संचालनालयात प्रशासन अधिकारीपदी कार्यरत होत्या.
नियुक्त्यांमध्ये अर्थकारण?
महाराष्ट्र राज्य परीक्षा परिषदेच्या वतीने शिक्षक भरतीसाठी सन 2010 मध्ये सीईटी परीक्षा घेण्यात आली होती. या परीक्षेतील गुणवत्तेनुसार उमेदवारांची शाळांमध्ये भरती झाली होती. प्राथमिक शिक्षण संचालनालयाच्या आदेशानुसार उमेदवारांच्या कागदपत्रांची पडताळणी करुन त्यांना मागील काही वर्षांमध्ये नियुक्त्याही देण्यात आल्या. यात आर्थिक देवाण-घेवाण झाल्याची चर्चा आहे.