पुणे – चालकांनी सुरक्षितपणे वाहन चालवावे आणि सिग्नललादेखील स्टॉप लाईनच्या मागे वाहन थांबवावे यासाठी आता पुणे महानगर परिवहन महामंडळाच्या (पीएमपी) चालकांना ऑनलाइन प्रशिक्षण देण्यात येणार आहे.
शहराच्या महापौरांनी जाहीर केलेल्या “पुणे रस्ते सुरक्षा अभियाना’त पीएमपीदेखील सहभागी होणार आहे. या अनुषंगाने पुणे महानगर परिवहन महामंडळाच्या वतीने “आमचे बस चालक रेड सिग्नलला त्यांची बस न चुकता स्टॉप लाईनमागे थांबवतील’ असे आश्वासन दिले. याच पार्श्वभूमीवर पीएमपीच्या चालकांना ऑनलाइन प्रशिक्षण देण्यात येणार आहे. यासाठी प्रशासनाने “गुगल फॉर्म’ आणि “व्हिडीओ’ तयार केला.
अनेकदा ब्रेक न लागल्याने पीएमपी बसेस रेड सिग्नल असूनही स्टॉप लाईनच्या मागे उभ्या राहात नाहीत. त्यामुळे नियमांचे उल्लंघन होते. याच पार्श्वभूमीवर आता चालकांना हे प्रशिक्षण देण्यात येणार आहे. यासाठी “सेव्ह पुणे ट्रॅफिक मूव्हमेंट’ सामाजिक संस्थेने यासाठी एक व्हिडीओ तयार केला.
संबंधित व्हिडीओमध्ये गाडी स्टॉप लाईनवर कशी थांबवावी, याबाबत सूचना देण्यात आल्या आहेत. हा व्हिडीओ आणि गुगल फॉर्म चालकांना पाठवण्यात येत असून, व्हिडीओ पाहिल्यानंतर चालकांनी फॉर्ममध्ये उत्तरे लिहीणे आवश्यक आहे. या फॉर्ममध्ये चालक, डेपोची माहिती सिग्नलबाबतचे प्रश्न आदीचा समावेश आहे.