बॅंकेच्या संदर्भातल्या सुरुवातीच्या काही मिटिंग्ज शारदा मठाजवळ होत असत. तिथे स्वामी विवेकानंदांच्या शिष्या भगिनी निवेदितांच्या कामाचा गौरवास्पद उल्लेख वारंवार होत असे. स्वामी विवेकानंदांच्या या शिष्या जन्माने आयरिश होत्या. त्यांचे मूळ नाव मार्गारिट नोबेल.
त्या 1895 मध्ये पहिल्यांदा लंडनमध्ये स्वामी विवेकानंदांना भेटल्या विवेकानंदांचे विचार त्यांचा व्यासंग आणि जनहिताची त्यांची तळमळ यामुळे मार्गारिट भारावून गेल्या. त्या 1898 मध्ये आपली सर्व पार्श्वभूमी मागे टाकत कलकत्त्याला येऊन राहिल्या त्या काळात स्वामी रामकृष्ण परमहंस यांच्या पत्नी शारदा देवी यांच्याशी त्यांचा घनिष्ठ स्नेहबंध जुळला.
1899 मध्ये कलकत्त्यात आलेली प्लेगची साथ, कलकत्त्यात 1906 मध्ये पडलेला दुष्काळ अशा विविध आपत्तीच्या काळात सामान्य नागरिकांसाठी त्यांनी मोठे मदत कार्य उभे केले. स्वामी विवेकानंदांनी आपल्या या गुरु बहिणीला भगिनी निवेदिता असे नवे नाव दिले. भगिनी निवेदितांनी भारतातील वास्तव्यामध्ये अगदी शेवटापर्यंत दीनदुबळ्यांना, अडला नडल्यांना मदतीचा हात देऊ केला.
आपल्याकडेही महिलांनी आपल्याच माता भगिनींसाठी काम का करू नये? या दृष्टीने व त्या थोर महिलेचे उदाहरण सतत डोळ्यासमोर ठेवावे म्हणून बॅंकेला भगिनी निवेदितांचेच नाव द्याव हा विचार पक्का केला गेला. याबाबत डॉ. सरोजिनी बाबर यांनी पुढाकार घेतला होता.