म्हैसूरचे “कर्नाटक’ असे नामांतर
नवी दिल्ली, ता. 27 – म्हैसूर राज्याचे कर्नाटक असे नामकरण करणाऱ्या विधेयकाचे आज लोकसभेत फार मोठ्या प्रमाणावर स्वागत झाले. या विधेयकावरील चर्चेत बोलताना एका सभासदामागे दुसरा असे अनेक सभासद तीन कोटी कन्नड भाषिकांचे स्वप्न साकार झाले म्हणून अभिनंदन करीत होते. म्हैसूरचे कर्नाटक असे नामकरण व्हावे अशा आशयाचे विधेयक राज्यमंत्री के. सी. पंत यांनी मांडले. म्हैसूरचे नामकरण “कर्नाटक’ करावे, अशा आशयाचे एक विधेयक म्हैसूर विधानसभेत गेल्या वर्षीच मंजूर करण्यात आले होते. भाषिक राज्ये झाल्यानंतर 17 वर्षांनी म्हैसूरचे कर्नाटक नामकरण आले, अशी एक आठवण एका सभासदाने केली.
पुण्यातील 150 बेकऱ्या तीन दिवस बंद राहणार
पुणे – पुणेकरांना येत्या तीन दिवसांत पाव व बिस्कीट मिळणार नाहीत कारण मैदा व वनस्पती तुपाची टंचाई आहे. त्यामुळे तीन दिवस 150 बेकऱ्या बंद राहतील.
प्रेस कामगारांचा लढा संपलेला नाही
पुणे – “प्रेस कामगारांचा लढा अद्याप संपलेला नाही. हायकोर्टाचा निर्णय कामगारांना एक वर्ष बंधनकारक आहे. त्यानंतर आपण पुन्हा लढण्यास सुरुवात केली पाहिजे’, असे आवाहन कामगार नेते ए. डी. भोसले यांनी आज प्रेस कामगारांच्या जाहीर सभेत केले.
ते म्हणाले, देशात कुठल्याही कामगाराला कमीत कमी 354 रुपये पगार मिळालाच पाहिजे. केंद्रीय कर्मचारी त्यासाठी देशव्यापी संप करण्याच्या तयारीत आहेत. या मोठ्या चळवळीचा भाग म्हणून प्रेस कामगारांनी पुढे चाल करावयाची आहे.
अफगाण राज्यघटना रद्द ,नव्या अध्यक्षांचा वटहुकूम
नवी दिल्ली – अफगाणिस्तानचे अध्यक्ष महंमद दाऊद यांनी देशाची 1964 ची राज्यघटना एका हुकुमाने रद्द केली आहे आणि कायदेमंडळाचे व अंमलबजावणीचे सर्व अधिकार स्वतःकडे
घेतले आहे.