पुणे -“राष्ट्रीय संरक्षण प्रबोधिनी’मध्ये (एनडीए) आयोजित “एनडीए इनलॅंड एन्टरप्रायजेस क्लास रिगाटा’मध्ये तरुणींनीच बाजी मारली असून, महिला कॅडेट जास्मीन अव्वल ठरली आहे. खडकवासला तलाव येथे याचे आयोजन करण्यात आले होते. त्याचा समारोप शुक्रवारी झाला. याला “एनडीए’ कमांडंट व्हाइस ऍडमिरल अजय कोचर उपस्थित होते.
स्वातंत्रदिनाचा अमृतमहोत्सव आणि “एनडीए’च्या 75 व्या स्थापना वर्षाबद्दल हा कार्यक्रम आयोजित केला होता. यामध्ये 82 संघातून 164 स्पर्धक सहभागी झाले होते. उत्कृष्ट कामगिरी करत “आर्मी यॉटिंग नोड’ने प्रथम आणि द्वितीय क्रमांक मिळवला. “भारतीय नौदल जलमॅनशिप ट्रेनिंग सेंटर, कोची’ने तृतीय क्रमांक पटकावला. कॅडेट जस्मिन आणि उदिता हल्दी यांचा समावेश असलेला “एनडीए’ संघ सर्वोत्कृष्ट महिला संघ’ म्हणून नावाजला गेला. कॅडेट जस्मिन ही राष्ट्रीय स्पर्धेत उत्कृष्ट कामगिरी करणारी पहिली महिला कॅडेट ठरली. या स्पर्धेत 12 वर्षांखालील 12 मुलांच्या सहभागाचेही स्वागत आणि कौतुक करण्यात आले.