पुणे – वेश्या व्यवसायातील महिला हा आपल्याच समाजातील एक अविभाज्य घटक आहे. हा व्यवसाय आजचा नसून पुरातन काळापासून सुरू आहे. या व्यवसायालाही सन्मानाची वागणूक मिळाली पाहिजे, कारण या वेश्या व्यवसायामुळे समाजामध्ये आज शांतता आणि सुरक्षा आहे, असे मत सामाजिक कार्यकर्त्या अमृता फडणवीस यांनी व्यक्त केले.
पुणे शहर भाजप महिला आघाडीच्या अध्यक्षा अर्चना तुषार पाटील यांच्या वतीने प्रदेशाध्यक्ष चंद्रकांत पाटील यांच्या वाढदिवसानिमित्त लालबत्ती भागातील महिलांसाठी आरोग्य शिबीर आणि मुलीसाठी सुकन्या कार्ड चे वाटप कार्यक्रमाचे आयोजन करण्यात आले होते. यावेळी त्या बोलत होत्या.
यावेळी अर्चना पाटील म्हणाल्या, महिलांच्या आरोग्याचे अनेक प्रश्न असतात. याभागातील महिलांना अनेक कारणांमुळे आरोग्याची काळजी घेता येत नाही. यामुळे आरोग्य शिबिराचे आयोजन करण्यात आले. शिवाय या महिलांच्या वृध्दपकाळात यांना हक्काचे छत मिळावे म्हणून या महिलांसाठी वृध्दाश्रम करण्यात यावे, अशी मागणी यावेळी पाटील यांनी अमृता फडणवीस यांच्याकडे केली.
यावेळी पुणे शहर भाजप अध्यक्ष जगदीश मुळीक, महिला मोर्चा प्रदेशाध्यक्ष उमा खापरे, महिला आघाडीच्या सर्व उपाध्यक्षा, सरचिटणीस, पदाधिकारी कार्यकर्त्या आणि महिला मोठ्या संखेने उपस्थित होत्या. कार्यक्रमाचे सूत्रसंचालन संदीप पाटील आणि अश्विनी पवार यांनी केले.