देहूगाव – तीर्थक्षेत्र देहू येथील गायरान जागा विविध विकासकामांसाठी अपुरी पडत आहे. त्यामुळे ती जागा पोलीस आयुक्ताला देण्यात येऊ नये यासाठी शुक्रवारी (दि. 13) तीर्थक्षेत्र देहू परिसर बंद ठेवण्यात येणार आहे. नगरपंचायत, नगराध्यक्षा, उपनगराध्यक्षा, सर्व नगरसेवक, नगरसेविका आणि जगद्गुरु श्री संत श्रेष्ठ तुकाराम महाराज संस्थान यांच्या नावे फ्लेक्स लावण्यात आले आहेत.
तीर्थक्षेत्र देहू येथील सर्वे नं.97 या गायरान जमीन क्षेत्रातील 50 एकर जागा पिंपरी चिंचवड पोलीस आयुक्तालयाला देण्यासाठी शासनाकडून हालचाली सुरू आहेत. क्रीडांगण, रुग्णालय, उद्यान, सांस्कृतिक भवन, भक्तनिवास, अन्नछत्रालय, वाहनतळ, विश्रामगृह, संग्रहालय यांसह आध्यात्मिक, गावयात्रा, पालखी सोहळा, श्री संत तुकाराम महाराज जन्मोत्सव सोहळा, कार्तिक यात्रा, बीज सोहळा, आषाढी पालखी सोहळा, आध्यात्मिक, धार्मिक अशा विविध कार्यक्रमांसाठी आणि विविध विकास कामांसाठी लागणार आहे.
या कामांसाठी जागा अपुरी पडणार असल्याने येथे पोलीस आयुक्तालय उभारू नये, अशी भावना गावकऱ्यांची आहे. पोलीस आयुक्तालयाला जागा देण्यासाठी अनेक वेळा विरोध करीत पत्र व्यवहार करण्यात आला आहे. त्यामुळे गायरान जागा देण्यास विरोध दर्शविण्यासाठी शुक्रवारी देहू परिसरात सर्व व्यवहार बंद ठेवण्यात येणार आहेत.
त्यासंदर्भातील चौकात, परिरात फ्लेक्स लावण्यात आले आहेत. अनेक ग्रामस्थांनी त्यासंदर्भातील व्हॉट्सऍपला स्टेट्स ठेवले आहेत. तसेच वारंवार विरोध करून देखील प्रशासन याकडे दुर्लक्ष करत असल्याने देहूकरांनी जाहीर निषेध नोंदविला आहे.