नवी दिल्ली – चंद्राच्या पृष्ठभागावर सल्फर असल्याची जी माहिती आधीच मिळाली होती, त्याला भारताच्या चांद्रयान मोहिमेने पुन्हा पुष्टी मिळाली आहे. त्यातून चंद्राच्या उत्पत्तीचे संकेत मिळू शकतात. त्यामुळे भारताच्या या संशोधनाला खूप गहन महत्त्व आहे, असे वैज्ञानिकांनी म्हटले आहे.
गुरुवारी, भारताच्या इस्रोने सांगितले की, प्रज्ञान रोव्हरवरील अल्फा पार्टिकल एक्स-रे स्पेक्ट्रोस्कोप उपकरणाने चंद्राच्या दक्षिणेला सल्फर आणि इतर काही घटकांच्या उपस्थितीची पुष्टी केली आहे. लेझर-इंड्युस्ड ब्रेकडाउन स्पेक्ट्रोस्कोप या आणखी एका उपकरणाला या प्रदेशात सल्फर सापडला आहे. अपेक्षेनुसार इस्रोच्या उपकरणाने ऍल्युमिनियम, कॅल्शियम, लोह, क्रोमियम, टायटॅनियम, मॅंगनीज, सिलिकॉन आणि ऑक्सिजन शोधल्याचा अहवाल दिला.
चंद्रावर सापडलेले घटक हे केवळ पृथक संयुगे नाहीत. ते वैश्विक इतिहासाची माहिती देऊ शकणारे टाइम कॅप्सूल आहेत. असे निष्कर्ष केवळ चंद्राच्या निर्मितीबद्दलच्या आपल्या आकलनाला आकार देत नाहीत तर चंद्राचा शोध आणि निवासासाठी संभाव्य शक्यता देखील सूचित करतात असे इस्रोचे वैज्ञानिक आकाश सिन्हा यांनी पीटीआयला सांगितले.आपण आता महत्त्वपूर्ण शोधाच्या उंबरठ्यावर उभे आहोत, असेही त्यांनी नमूद केले.
पृष्ठभागावरील सल्फर ज्वालामुखीच्या क्रियेतून येतो, जे चंद्राच्या भूभागावर जड ज्वालामुखीची उपस्थिती दर्शवते. तथापि, शोध फक्त एकाच ठिकाणाहून आहे, त्यामुळे आम्हाला स्पष्ट चित्र मिळविण्यासाठी अधिक डेटाची आवश्यकता आहे,असे आणखी एक शास्त्रज्ञ टी. व्ही. वेंकटेश्वरन यांनी सांगितले. खगोल भौतिकशास्त्रज्ञ संदिप चक्रवर्ती यांच्या म्हणण्यानुसार, हे घटक त्यांच्या शुद्ध स्वरूपात नाहीत आणि भविष्यातील निष्कर्षणासाठी प्रक्रिया करणे आवश्यक आहे. चांद्रयान-3 ने लावलेले शोध परिणामकारक आहेत, असेही त्यांनी म्हटले आहे.