पुणे, {प्रभात वृत्तसेवा} – लोकसभा निवडणुकीवेळी दिव्यांग व ज्येष्ठ नागरिकांसाठी मतदान केंद्राच्या दर्शनी भागात दिशादर्शक फलक लावावेत. तेथे सुस्थितीतील रॅम्प, व्हील चेअर, विश्रांती कक्ष, पिण्याच्या पाण्याची सुविधा, स्वच्छतागृह, प्रथमोपचार पेटी असावी. मतदान केंद्र तळमजल्यावर असावे. स्वतंत्र वाहनतळ असावे. दिव्यांग व ज्येष्ठ नागरिकांना रांगेत न थांबवता मतदान करण्याची स्वतंत्र व्यवस्था करा, अशा सूचना विभागीय आयुक्त डॉ. चंद्रकांत पुलकुंडवार यांनी दिल्या.
निवडणूक आयोगाच्या निर्देशानुसार लोकसभा निवडणुकीच्या पार्श्वभूमीवर विभागीय आयुक्त डॉ. पुलकुंडवार यांनी शहरातील मतदान केंद्रांना भेटी देऊन दिव्यांग व ज्येष्ठ नागरिकांसाठी पुरविण्यात येणाऱ्या सुविधांची माहिती घेतली. त्यावेळी त्यांनी या सूचना दिल्या.
पुणे लोकसभा मतदार संघाअंतर्गत २०९-शिवाजीनगर विधानसभा मतदार संघातील भारत इंग्लिश स्कुल, सीओईपी इंजिनिअरिंग कॉलेज व विद्याभवन ज्युनिअर कॉलेज, मॉडेल कॉलनी तसेच २१४-पुणे छावणी विधानसभा मतदार संघाअंतर्गत संत गाडगेमहाराज विद्यालय, कोरेगाव पार्क, आगरकर मुलींची शाळा, सोमवार पेठ व जनता विद्यालय,
ताडीवाला रोड आणि २१५-कसबा पेठ विधानसभा मतदार संघाअंतर्गत एसएनडीटी कन्याशाळा, नारायण पेठ, शेट हिरालाल सराफ हायस्कुल, बुधवार पेठ व पुणे महानगरपालिका शाळा क्रमांक ७ या ठिकाणी विभागीय आयुक्तांनी भेटी दिल्या. यावेळी विभागीय उपायुक्त रामचंद्र शिंदे, पुणे महानगरपालिकेचे उपायुक्त राजीव नंदकर, उपविभागीय अधिकारी सिद्धार्थ भंडारे आदी उपस्थित होते.