कोयनानगर – ज्याने आपल्या भंपक आणि वाचळवीर तोंडाने ठाकरे सेना संपवली. त्या संजय राऊत यांची लोकनेते किंवा त्यांचे नातू संसदपटू उत्पादन शुल्क मंत्री शंभूराज देसाई यांच्यावर बोलण्याची लायकी नाहीच. मात्र, त्यांनी सातारा जिल्ह्यात येऊन हिंदूहृदयसम्राट बाळासाहेब ठाकरे यांच्या विचारांची प्रतारणा केली किंवा त्यांच्या विचारांचा अवमान थांबवला नाही. तर त्यांच्या तोंडात शेण कोंबण्याची धमक लोकनेत्यांच्या कार्यकर्त्यांकडे आहे, असा इशारा शिवसेनेचे सातारा जिल्हाप्रमुख जयवंतराव शेलार यांनी प्रसिद्धीपत्रकाद्वारे दिला आहे.
या प्रसिद्धीपत्रकात म्हटले आहे की, भंपक आणि खाणेरड्या तोंडाने सुसंस्कृत महाराष्ट्रात घाण कालवणारा संजय राऊत शिवरायांची राजधानी असलेल्या सातारा जिल्ह्यात येऊन भुंकतो आहे. बाळासाहेब ठाकरे हे शिवसेना स्थापन करत होते, तेंव्हा पक्षीय भेद विसरून लोकनेते त्यांच्या पाठीशी उभे होते. स्वर्गीय बाळासाहेब ठाकरे यांनी उभ्या आयुष्यात लोकनेते यांच्या घराण्याकडे पूर्ण सन्मानाने पाहिले.
लोकनेते यांचे नातू शंभूराज हे हिंदुहृदयसम्राट यांच्या समीप येणार हे समजल्यावर स्वतः बाळासाहेब ठाकरे यांनी “शंभूराजला इकडे बोलवू नका, मीच तिकडे जाणार’ असे सांगून शंभूराज यांचा सन्मान केला होता. तेव्हा हे भंपक चिटोऱ्या गिरवत बसायचे. त्याला काय माहीत? उगाच ट ला ट आणि र ला र लावून शिव्या खाणाऱ्या संजय राऊत यांना म्हणूनच सारा महाराष्ट्र शिव्यांची लाखोली वाहत आहे.
हिंदुहृदयसम्राट बाळासाहेब ठाकरे यांनी पहिला लाल दिवा देऊन सन्मान केला आणि शंभूराज यांना आपल्या कवेत घेतले.
ही होती बाळासाहेब ठाकरे यांची संस्कृती. याच संस्कृतीला तिलांजली देणारा हा संजय राऊत केवळ लोकनेते व त्यांचे नातू शंभूराज यांचाच नव्हे, तर हिंदुहृदयसम्राट बाळासाहेब ठाकरे यांच्या विचारांचा अवमान करत आहे. ठाकरे-देसाई या घराण्यातील ऋणानुबंध हे गेल्या तीन पिढ्यांपासूनची आहेत. आजतागायत यावर कोणी अवाक्षर बोलले नाही. कोणी भुंकला म्हणून हे ऋणानुबंध दुरावणार नाहीत. संजय रावतने किमान सातारा जिल्ह्यात येताना तरी तोंडाला लगाम लावावा. नाहीतर इथली शिवभक्त जनता कोणताही पक्षभेद किंवा गटभेद न ठेवता त्याच्या तोंडात शेण कोंबल्याशिवाय राहणार नाही, असा गर्भित इशाराही या प्रसिद्धीपत्रकातून देण्यात आला आहे.