पुणे –पुणे महापालिकेची मुदत 14 मार्च रोजी संपत आहे. त्यामुळे निवडणुकीसाठी सगळ्याच राजकीय पक्षांनी जोरदार मोर्चेबांधणी सुरू केली असून निवडणूक लढविण्याची अनेकांनी तयारी केली आहे. मतदारांपर्यंत पोहचण्याचा त्यांच्याकडून खटाटोपही सुरू आहे. मात्र, आता प्रतीक्षा आहे ती निवडणुकीचा कार्यक्रम जाहीर होण्याची. मात्र, त्यास विलंब होत असल्याने काहीसा त्यांचा हिरमोड झाल्याचे चित्र आहे.
पुणे महापालिकेसह राज्यातील मोठ्या महापालिकांची मुदत मार्च 2022 मध्ये संपुष्टात येत आहे. पण, करोना आणि आरक्षणाच्या प्रक्रियेमुळे निवडणुकीच्या प्रक्रियेला विलंब झाला आहे. नियमित वेळेत निवडणूक झाल्यास आतापर्यंत आचारसंहिता लागू होणे अपेक्षित होते. परंतु, तसे न झाल्याने अनेक इच्छुकांची घालमेल वाढली आहे. त्यातच आरक्षणाचा तिढा जोपर्यंत सुटत नाही, तोपर्यंत निवडणुका न घेण्याचा राजकीय मंडळींनी सूर आवळला होता. मुदत संपणाऱ्या महापालिकांवर प्रशासक नियुक्त करण्याच्या हालचालीही सुरू झाल्या होत्या. 1 फेब्रुवारी रोजी प्रभाग रचना जाहीर होऊन त्यावर सूचना आणि हरकती मागवण्यात आल्या. त्यावर सुनावणीही पार पडली. त्यामुळे काहीसा दिलासा मिळाला आहे. यावरून निवडणूक कार्यक्रम लवकरच जाहीर होईल, असे बोलले जात आहे. त्यामुळे निवडणुकीच्या अनुषंगाने पुन्हा शहरातील राजकारण तापण्याची चिन्हे आहेत. राजकीय पक्षांकडूनदेखील उमेदवारांची चाचपणी केली जात आहे. इच्छुक उमेदवाराची प्रतिमा, त्यांचा संपर्क, आर्थिक क्षमता, मतदारांपर्यंत पोहोचण्याची धडपड आदी बाबींचा त्यासाठी आढावा घेतला जात आहे. त्यामुळे इच्छुकांकडून जोरदार तयारी सुरू आहे.
कार्यक्रम आयोजनांवर जोर
गेले दोन वर्षे करोनामूळे भीती आणि चिंतेचे वातावरण होते. मात्र, आता करोना प्रतिबंधक लसीकरण झाल्याने संसर्गाचा धोका बराच कमी झाला आहे. त्यामुळे करोनामुळे लावण्यात आलेले निर्बंध आता शिथिल होत आहेत. जनजीवन पूर्ववत होत आहे. त्यामुळे इच्छुकांकडून मतदारांना आकर्षित करण्यासाठी सहली, सांस्कृतिक कार्यक्रम, सण-वारांच्या दिवशी गाठीभेटींचा कार्यक्रम आयोजनावर जोर दिला आहे.