राजगुरूनगर -पुणे-नाशिक राष्ट्रीय महामार्गावरून भरधाव वेगात येणारी वाहने आणि होणारे अपघात टाळण्यासाठी शिरोली (ता. खेड) येथे दोन्ही बाजूकडून महामार्गावर गतिरोधक बसविण्याची मागणी जिल्हा परिषद शाळेच्या शिक्षकांसह सरपंच मुदिता देखणे व शिरोली ग्रामस्थांनी पुणे-नाशिक राष्ट्रीय महामार्ग प्रकल्प संचालक यांच्याकडे केली आहे.
पुणे नाशिक राष्ट्रीय महामार्गालगत शिरोली गाव आहे. पुणे बाजूकडून राजगुरुनगर बाजूकडे उतार असल्याने येणारी वाहने वेगात असतात, तर राजगुरुनगर बाजूकडून सुसाट वेगाने महामार्गावर धावतात. शिरोली येथे पाईट बाजूकडून येणारी जाणारी वाहने महामार्ग ओलांडत असतात.
तर महामार्ग ओलांडून जिल्हा परिषद प्राथमिक शाळेत जाणाऱ्या येणाऱ्या विद्यार्थ्यांची संख्या मोठी आहे. त्यामुळे भरधाव वेगात रस्ता ओलांडताना विद्यार्थ्यांसह ग्रामस्थांचे व वाहनांचे अनेक मोठे अपघात झाले आहेत. भरधाव वेगात शिरोलीतून जाणाऱ्या वाहनांचा वेग 80 ते 100 किमी असतो,
या वाहनांच्या वेगावर नियंत्रण ठेवण्यासाठी गतिरोधक गरजेचे आहेत. अपघात टाळण्यासाठी शिरोली गावाजवळ दोन्ही बाजूकडून गतिरोधक बसविण्यात यावेत अशी गेली 7 वर्षांपासून ग्रामस्थ, शाळेचे शिक्षक यांची मागणी आहे; मात्र याकडे महामार्ग प्रशासनाचे दुर्लक्ष केले होते.
शिरोली गावात महामार्गावर होणारे अपघात टाळण्यासाठी वाहनाचा वेग कमी राहण्यासाठी गतिरोधक आवश्यक असल्याची बाब पुणे नाशिक राष्ट्रीय महामार्ग समन्वयक दिलीप मेदगे यांना शिरोलीचे सरपंच, ग्रामपंचायत सदस्य व ग्रामस्थ यांनी शिरोली येथे लक्षात आणून दिली व गतिरोधक बसविण्याची मागणी केली. पुणे-नाशिक राष्ट्रीय महामार्ग समन्वयक दिलीप मेदगे यांनी शिरोली गावातून जाणाऱ्या महामार्गावरील परिस्थितीचा तेथे जाऊन पाहणी करून त्याबाबत महामार्ग प्रशासनाच्या लक्षात आणून दिले.
यावेळी आरपीआय श्रमिक ब्रिगेडचे जिल्हाध्यक्ष संतोषनाना डोळस, भाजपचे नेते राजन परदेशी, रिपब्लिकन सेनेचे जिल्हा अध्यक्ष संजय देखणे, आरपीआय संपर्क प्रमुख विशाल कांबळे, संतोष गाडेकर, शिरोलीच्या सरपंच मुदिता देखणे, माजी सरपंच रवींद्र सावंत, चंद्रकांत सावंत, माजी उपसरपंच अजित वाडेकर, संतोष खरपासे, अमोल उमाप, शाळा व्यवस्थापन समितीचे अध्यक्ष अरुण सावंत, सुरेश शिंदे, नवनाथ पारघे, हर्षल सावंत, अनिल बेंडाले, निखिल पारघे, सुधाकर चव्हाण, ग्रामसेवक एस आर सरपाते, मुख्याध्यापक राजेश कांबळे, संजय सुपे यांच्यासह ग्रामस्थ उपस्थित होते.
दोन्ही बाजूकडे गावाचा विस्तार, महामार्गालगत असलेली जिल्हा परिषदेची शाळेतील विद्यार्थ्यांची संख्या व रस्ता ओलांडताना घडणाऱ्या दुर्घटना विचारात घेता येथे तात्काळ गतिरोधक बसविण्यासाठी महामार्ग प्रकल्प संचालक यांच्याकडे तत्काळ पाठपुरावा केला जाईल. विद्यार्थी ग्रामस्थ यांना सुरक्षित वाटेल अशा ठिकाणी गतिरोधक बसविण्यात येतील.
– दिलीप मेदगे, पुणे नाशिक राष्ट्रीय महामार्ग समन्वयक